Qytaı 2027 jylǵa qaraı iri kólemdi ónerkásiptik jasandy ıntellekt ekojúıesin qurmaqshy
ASTANA.KAZINFORM — Qytaı 2027 jylǵa qaraı óziniń ulttyq jasandy ıntellekt ındýstrııasyn álemdik kóshbasshyǵa aınaldyrýdy, sondaı-aq ónerkásipte ıntellektýaldy tehnologııalardy engizýdi keńeıtýdi josparlap otyr. Bul týraly Qytaı úkimetiniń jańa saıası qujatynda aıtylǵan, dep habarlaıdy Kazinform agenttiginiń menshikti tilshisi.
Resmı habarlamaǵa sáıkes, Beıjiń jaqyn arada birneshe mańyzdy mindetterge nazar aýdarýdy josparlap otyr. Ónerkásiptik sektor úshin úsh-bes iri kólemdi salalyq jasandy ıntellekt modeli josparlanǵan, al ekonomıkanyń ártúrli salalary úshin mamandandyrylǵan tsıfrlyq sheshimder ázirlenýi tıis.
Qujatta 1000 ónerkásiptik jasandy ıntellekt agentterin iske qosý, 100 mamandandyrylǵan derekter jıyntyǵyn jasaý jáne ıntellektýaldy tehnologııalardy paıdalaný jaǵdaılaryn tikeleı óndiris jelilerinde keńinen masshtabtaý kózdelgen.
Qytaı úkimeti jańa ónerkásiptik júıelerdiń negizin quraıtyn eki-úsh álemdik deńgeıdegi tehnologııalyq alyptardyń paıda bolýyn kútedi. Osy ekojúıelik korporatsııalardyń aınalasynda joǵary tehnologııalyq shaǵyn jáne orta kásiporyndar jelisi qurylady. Damyǵan ashyq bastapqy kody bar ekojúıeni qurý strategııanyń negizgi aspektisi retinde anyqtalǵan.
Bul maqsattardy is júzinde júzege asyrý apparattyq jáne baǵdarlamalyq jasaqtamany úılesimdi túrde ázirleýdi talap etedi. Qujatta oqytý jáne qorytyndylaý tapsyrmalary úshin esepteý qýatynyń tıimdiligin arttyrý, sondaı-aq jasandy ıntellekt júıelerin paıdalaný kezinde energııa tutynýdy azaıtý qajettiligi atalyp ótken.
Aldaǵy kezeńde Qytaı jasandy ıntellekt tehnologııalaryn ónerkásiptik robottar men joǵary tehnologııalyq stanoktarǵa ıntegratsııalaýǵa da nazar aýdarady. Sonymen qatar, algorıtm qaýipsizdigin nyǵaıtý jáne oqytý derekter jıyntyǵynyń senimdi qorǵalýyn qamtamasyz etý basymdyqqa ıe bolady.
Strategııanyń halyqaralyq quramdas bóligi jahandyq yntymaqtastyq arqyly jańa artyqshylyqtardy damytýdy kózdeıdi. Beıjiń jasandy ıntellekt ónimderin ártúrli aımaqtardyń naqty qajettilikterine beıimdeýdi qoldaýǵa, sheteldik naryqtarǵa kiretin kompanııalarǵa qoldaý kórsetýge jáne salaǵa sheteldik kapıtaldy tartýdy jáne sheteldik kompanııalardyń Qytaıda generatıvti jasandy ıntellekt tehnologııalaryn damytýǵa qatysýyn yntalandyrýǵa nıetti.
Biz buǵan deıin Qytaıdyń ulttyq sýperkompıýterlik jelisine negizdelgen avtonomdy jasandy ıntellekt júıesin iske qosqany týraly habarlaǵan bolatynbyz.