Qytaı 2026 jyly jalpy ishki ónimniń ósimi 4,5–5% bolady dep boljaıdy
ASTANA.KAZINFORM — Qytaı úkimeti 2026 jylǵa arnalǵan ekonomıkalyq ósim boıynsha maqsatty kórsetkishti 4,5%–5% aralyǵynda belgiledi. Bul sheshim el bıliginiń deflıatsııalyq qaýipter men qurylymdyq baıaýlaýǵa qarsy kúresý úshin bıýdjettik qoldaýdy kúsheıtýge daıyn ekenin kórsetedi, dep habarlaıdy Kazinform agenttiginiń Beıjińdegi menshikti tilshisi.
Beısenbi kúni ótken Búkilqytaılyq halyq ókilderi jınalysynyń jyl saıynǵy sessııasynyń ashylýynda usynylǵan esepte bılik belgilengen mejeden joǵary ósimge qol jetkizýge umtylatynyn atap ótti. Qujatta tutyný baǵalary ındeksiniń ósimi 2%, al jumyssyzdyq deńgeıi shamamen 5,5% deńgeıinde saqtalady dep kórsetilgen.
Álemdegi ekinshi iri ekonomıkany yntalandyrý maqsatynda Qytaı úkimeti bıýdjet tapshylyǵyn JІÓ-niń 4%-yna deıin ulǵaıtýdy josparlap otyr. Bul 5,89 trln ıýandy ($853,6 mlrd) quraıdy, al bul ótken jylmen salystyrǵanda 230 mlrd ıýanǵa ($33,3 mlrd) artyq.
Jalpy memlekettik bıýdjettik shyǵystar alǵash ret 30 trln ıýanǵa ($4,35 trln) jetpek, bul ótken jylmen salystyrǵanda 1,27 trln ıýanǵa ($184 mlrd) kóp. Bul Qytaıdyń belsendirek bıýdjettik saıasatqa kóshkenin bildiredi.
2026 jylǵa arnalǵan qaryz alý baǵdarlamasyna 1,3 trln ıýan ($188,4 mlrd) kóleminde arnaıy uzaqmerzimdi memlekettik oblıgatsııalar shyǵarý kiredi. Bul qarajat:
-
memlekettik basym jobalardy júzege asyrýǵa,
-
strategııalyq mańyzdy salalardyń qaýipsizdigin kúsheıtýge,
-
ónerkásiptik jabdyqtardy jańartýǵa,
-
halyq tutynýyn yntalandyrý baǵdarlamalaryn qarjylandyrýǵa (sonyń ishinde eski tehnıka men taýarlardy jańasyna aýystyrý baǵdarlamalaryna) baǵyttalady.
Qarjy sektoryn qoldaý aıasynda Qytaı bıligi 300 mlrd ıýan ($43,5 mlrd) kóleminde arnaıy oblıgatsııalar shyǵaryp, iri memlekettik bankterdiń kapıtalyn tolyqtyrýdy josparlap otyr. Buǵan qosa, jergilikti bılikke arnalǵan maqsatty oblıgatsııalar kvotasy 4,4 trln ıýandy ($637,7 mlrd) quraıdy. Bul óńirlerge ınfraqurylymdyq jobalardy júzege asyrýda qarjylyq qoldaý beredi.
Aıta keteıik, buǵan deıin Qytaıdyń 2026 jyly qorǵanys shyǵyndaryn 7%-ǵa arttyratyny habarlanǵan bolatyn.
