Qytaı 2026 jyly ımporttyq kedendik bajdy ýaqytsha tómendetedi
ASTANA. KAZINFORM – 2026 jylǵy 1 qańtardan bastap Qytaı 935 taýar pozıtsııasy boıynsha ımporttyq kedendik bajdardy tómendetedi. Bul rette ýaqytsha mólsherlemeler eń qolaıly jaǵdaı rejıminde qoldanylatyn deńgeıden tómen bolady, dep habarlaıdy QHR Memlekettik keńesi janyndaǵy Kedendik tarıfter komıteti.
«2026 jylǵa arnalǵan kedendik tarıfterdi túzetý josparyna» sáıkes, bajdardy tómendetý jańa sapaly óndirgish kúshterdi damytý úshin qajetti negizgi jınaqtaýshy bólshekter men ozyq materıaldardy qamtıdy. Bul uǵymdy Beıjiń joǵary qosylǵan quny bar ınnovatsııalyq salalardy sıpattaý úshin qoldanady.
Qabyldanǵan sharalar ekologııalyq transformatsııany qoldaıtyn shıkizat taýarlaryna da qatysty bolmaq. Atap aıtqanda, lıtıı-ıondy akkýmýlıatorlar óndirisinde paıdalanylatyn qaıta óńdelgen qara untaqqa kedendik jeńildikter qarastyrylǵan.
Densaýlyq saqtaý salasynda da birqatar jeńildikter engiziledi. Ulttyq «Salaýatty Qytaı» bastamasy aıasynda jasandy qan tamyrlary, dıagnostıkalyq test-júıeler sekildi mamandandyrylǵan medıtsınalyq ónimderge baj mólsherlemeleri tómendetiledi.
Sonymen qatar damýshy eldermen saýda baılanystaryn keńeıtý maqsatynda Beıjiń Qytaımen resmı dıplomatııalyq qatynastary bar 43 eń az damyǵan memleket úshin nóldik baj rejımin saqtaıdy. Bul jeńildikter taýarlardyń 100 paıyzyna qoldanylady.
Qytaı ımporttyq bajdardy jyl saıyn qaıta qarap otyrady. Bul tetik jahandyq suranystyń ózgerýi jaǵdaıynda jáne tehnologııalyq táýelsizdikke qol jetkizý mindetteri aıasynda ekonomıkany ıkemdi túrde retteý quraly retinde paıdalanylady.
Buǵan deıin Qytaı 2026 jyly bıýdjettik shyǵystardy arttyratyny habarlanǵan bolatyn.