Qytaı 2026 jyly bıýdjettik shyǵystardy arttyrady
ASTANA. KAZINFORM — QHR Qarjy mınıstrligi 2026 jyly bıýdjettik shyǵystardy arttyryp, 2026–2030 jyldarǵa arnalǵan halyq sharýashylyǵy men áleýmettik damýdyń 15-besjyldyq josparyn iske asyrýdy senimdi bastaýǵa ýáde berdi, dep habarlaıdy Sınhýa.
Qytaı kelesi jyly neǵurlym belsendi qarjylyq saıasat júrgizýdi jalǵastyrady. Bul týraly QHR Qarjy mınıstri Lan Foan senbi-jeksenbi kúnderi ótken Búkilqytaılyq qarjy jumysy jónindegi keńeste málimdedi. Bul ustanym jýyrda ótken Ortalyq ekonomıkalyq jumys jónindegi keńeste aıtylǵan málimdemelermen sáıkes keledi.
Keńes barysynda 2026 jyly memlekettik oblıgatsııalardyń tıimdiligin barynsha paıdalaný jáne transferttik tólemderdiń nátıjeliligin arttyrý úshin neǵurlym batyl sharalar qabyldaý qajettigi atap ótildi.
Shyǵystar qurylymy únemi jetildirilip, sondaı-aq fıskaldyq jáne qarjylyq saıasat arasyndaǵy ózara úılesim kúsheıtiledi.
Mınıstrlik tutynýdy yntalandyrý maqsatynda tutyný taýarlaryn treıd-ın baǵdarlamasyna qarjylaı qoldaýdy jalǵastyrady.
Sonymen qatar tıimdi ınvestıtsııalardy keńeıtip, jańa sapadaǵy óndirgish kúshterdi damytý jáne kadr daıarlaý sııaqty negizgi baǵyttarǵa qarjylandyrýdy arttyrýdy kózdep otyr.
Lan Foan bıýdjettik sharalar jańa jumys oryndaryn ashýǵa, halyq tabysyn arttyrýǵa, sapaly bilim berýdi damytýǵa, medıtsınalyq qyzmetti jaqsartýǵa jáne áleýmettik qamsyzdandyrý júıesin jetildirýge baǵyttalatynyn atap ótti.
Sondaı-aq ol qoldanystaǵy jasyryn qaryzdarǵa baılanysty táýekelderdi joıý boıynsha jumysty kúsheıtip, olardyń ósýin qatań shekteýge shaqyrdy.
Budan buryn Qytaı strategııalyq mamandyqtardy iske qosýdyń jyldam mehanızmin engizgenin jazǵanbyz.