Qytaı 2026 jyly aýqymdy ǵaryshtyq baǵdarlamany júzege asyrady — CNSA
ASTANA. KAZINFORM — 2026 jyly Qytaı birqatar qarqyndy ǵaryshtyq mıssııany oryndaıdy, onyń ishinde «Tıanven-2» apparatynyń maqsatty asteroıdqa jaqyndap, ony zertteýi josparlanǵan. Bul týraly Qytaıdyń Ulttyq ǵarysh basqarmasy (CNSA) habarlady, dep jazady Sınhýa.
Sonymen qatar Qytaı pılottalǵan ǵarysh mıssııalaryn jalǵastyrady. Olardyń qatarynda «Shenchjoý-23» ushyrylymy, kóp ret qoldanylatyn zymyrandardyń ushý synaqtary jáne kommertsııalyq ǵarysh sektoryn damytý jumystary bar. Bul týraly CNSA júıelik ınjenerııa departamenti dırektorynyń orynbasary Lıý ıÝnfen Qytaıdyń ǵarysh kúnine arnalǵan baspasóz máslıhatynda málimdedi.
Ótken jylǵa sholý jasaı otyryp, Qytaıdyń ǵaryshty zertteýde aıtarlyqtaı ilgerileý jasaǵany atap ótildi. 2025 jyly el 92 ǵaryshtyq ushyrýdy júzege asyrǵan, bul 2024 jylmen salystyrǵanda 35%-ǵa kóp.
Lıý ıÝnfenniń aıtýynsha, «Tıanven-2» zondyn sátti ushyryp, ol 2016HO3 asteroıdyna ótpeli orbıtaǵa shyqqan. Bul Qytaıdyń asteroıdtardy zertteý jáne úlgi alyp qaıtý boıynsha alǵashqy mıssııasy bolyp otyr. Al «Tıanven-1» mıssııasy Marsty zertteýdi jalǵastyryp, 3,5 terabaıt ǵylymı derek álem ǵalymdaryna ashyq qoljetimdi bolǵan.
Pılottalǵan ǵarysh salasynda Qytaı tórt ushyrý men eki qaıtarý mıssııasyn sátti oryndaǵan. Sondaı-aq elde pılottalǵan Aı baǵdarlamasyna daıyndyq jalǵasyp jatyr.
Qytaı sondaı-aq negizgi ónerkásip salalarynda jáne qoǵamdyq tutyný sektorynda «Beıdoý» spýtnıktik navıgatsııa júıesin keń aýqymda engizýdi jedeldetti. «Tszyıýan-3-04» spýtnıginiń ushyrylýy Jerdi stereobaqylaý salasyndaǵy múmkindikterdi arttyrǵan.
Sondaı-aq spýtnıktik ınternet júıesin damytý qarqyndy júrip jatyr, al kóp ret qoldanylatyn zymyrandar baǵytyndaǵy synaqtar jalǵasady.
Osyǵan deıin Qytaı ınternet baılanys tehnologııalaryn damytýǵa arnalǵan synaq spýtnıgin orbıtaǵa shyǵarǵanyn jazdyq.
