Qytaı 2026 jylǵa qaraı bosanýdy tolyqtaı tegin etpek
ASTANA. KAZINFORM — Qytaı 2026 jylǵa qaraı búkil el boıynsha tegin bosanýdy qamtamasyz etýdi josparlap otyr, dep habarlaıdy Sınhýa.
Qytaı 2026 jylǵa deıin ata-analar úshin tegin bosanýdy qamtamasyz etetin aýqymdy jospardy ulttyq medıtsınalyq saqtandyrý júıesi aıasynda jarııalady.
Bul bastama senbi kúni ótken densaýlyq saqtaý qaýipsizdigi jónindegi ulttyq konferentsııada tanystyrylyp, eldegi týý kórsetkishiniń tómendeýin eńserýge baǵyttalǵan keshendi strategııanyń bir bóligi retinde usynyldy. Negizgi maqsat — bala týýǵa baılanysty qarjylyq júktemeni azaıtý.
Bılik ókilderiniń aıtýynsha, ulttyq medıtsınalyq saqtandyrý qorynyń qarjylyq múmkindikterin eskere otyryp, júktilik kezindegi tekserýlerge ketetin medıtsınalyq shyǵyndardy óteý kólemi keńeıtiledi.
Aldaǵy jylǵa qoıylǵan maqsat — el aýmaǵynda bosanýǵa ketetin negizgi shyǵyndardy tolyqtaı saqtandyrý baǵdarlamalary arqyly óteý. Bul jaǵdaıda azamattar saqtandyrý polısinde qarastyrylǵan standartty akýsherlik qyzmetter úshin óz qaltasynan tólem jasamaıdy.
— Qazirgi tańda Tszılın, Tszıansý jáne Shandýn provıntsııalaryn qosa alǵanda, jeti óńirde statsıonarlyq bosaný shyǵyndary saqtandyrý sheńberinde tolyq ótelip otyr. Resmı tulǵalar bul mindetteme tek standartty medıtsınalyq qyzmetterge qatysty ekenin atap ótti. Eger bolashaq ata-analar premıým sanattaǵy aýrýhanalardy nemese saqtandyrýdyń bazalyq tizimine kirmeıtin dári-dármekter men materıaldardy tańdasa, qosymsha shyǵyndar ótelmeıdi, — delingen habarlamada.
Sonymen qatar Qytaı Halyq Respýblıkasynyń Medıtsınalyq qamtamasyz etý jónindegi memlekettik basqarmasy ıkemdi jumyspen qamtylǵan azamattarǵa, eńbek mıgranttaryna jáne jumyspen qamtýdyń jańa túrlerindegi tulǵalarǵa júktilik pen bosanýǵa arnalǵan saqtandyrýdy keńeıtýdi josparlap otyr. Bul sharalar da týý kórsetkishin yntalandyrýǵa baǵyttalǵan.
Qazirgi ýaqytta Qytaıda júktilik pen bosanýǵa arnalǵan medıtsınalyq saqtandyrý shamamen 255 mıllıon adamdy qamtıdy.
Budan buryn Qytaı týý kórsetkishin arttyrý úshin kontratseptıvtik quraldarǵa salyq engizetinin jazǵan edik.
Sonymen qatar Qytaı Qarjy mınıstrligi bıyl ortalyq bıýdjetten bala kútimi boıynsha sýbsıdııalardy tóleýge 90 mıllıard ıýan (shamamen 12,6 mıllıard AQSh dollary) bólinetinin málimdedi.