Qytaı 2026 jylǵa arnalǵan syrtqy saıasat strategııasyn aıqyndady
ASTANA. KAZINFORM — Qytaıdyń syrtqy ister mınıstri Van I 30 jeltoqsanda QHR-dyń 2026 jylǵa arnalǵan syrtqy saıasatynyń negizgi baǵyttaryn tanystyrdy, dep habarlaıdy Kazinform agenttiginiń menshikti tilshisi.
Onyń aıtýynsha, jahandyq belgisizdik kúsheıgen jaǵdaıda Pekın Ǵalamdyq Ońtústiktiń rólin nyǵaıtýǵa jáne álemdegi iri derjavalarmen turaqty qarym-qatynastardy saqtaýǵa nıetti.
Pekındegi Dıaoıýıtaı rezıdentsııasynda ótken jyl saıynǵy dıplomatııalyq sımpozıýmda sóz sóılegen SІM basshysy 2026 jyl on besinshi besjyldyqtyń bastalýymen tuspa-tus keletinin atap ótip, bul qytaı dıplomatııasy aldyna joǵary deńgeıdegi mindetter qoıyp, jahandyq úderisterge júıeli kózqarasty talap etetinin aıtty.
Van I Qytaıdyń iri derjavalar arasyndaǵy qatynastardyń jańa formatyn qalyptastyrýǵa nıetti ekenin jetkizdi.
Onyń aıtýynsha, jetekshi memleketterdiń ózara is-qımylynyń sıpaty jahandyq turaqtylyqqa tikeleı áser etedi.
Basymdyqtardy baıandaýdy AQSh-pen qarym-qatynastan bastaǵan mınıstr ózara qurmet, beıbit qatar ómir súrý, yntymaqtastyq pen ózara tıimdilik qaǵıdattaryna negizdelgen jańa pozıtıvti ózara is-qımyl modelin qurýǵa umtylatynyn málimdedi. Bul rette Qytaıdyń egemendigi, qaýipsizdigi jáne damý múddelerin berik qorǵaý basty shart bolatynyn atap ótti.
Odan keıin mınıstr Reseımen qarym-qatynasqa toqtalyp, Qytaıdyń Máskeýmen uzaqmerzimdi tatý kórshi bolýǵa, jan-jaqty strategııalyq ózara is-qımylǵa jáne ózara tıimdi yntymaqtastyqqa negizdelgen baılanystardy nyǵaıtýdy jalǵastyratynyn, olardy jańa mazmunmen tolyqtyryp, halyqaralyq strategııalyq turaqtylyqty birlesip qoldaıtynyn aıtty.
Eýropamen qatynastar týraly sóz qozǵaǵan Van I Pekınniń Eýropalyq odaqpen ózara qurmet, aıyrmashylyqtardy eskerý jáne ashyq yntymaqtastyq negizinde dıalogty damytýǵa, kópjaqtylyqty qoldaý úshin áriptestik keńistigin keńeıtýge nıetti ekenin jetkizdi.
2026 jylǵy kún tártibinde shekaralas memleketterge erekshe nazar aýdaryldy.
Qytaı olardy ortaq taǵdyr qaýymdastyǵynyń negizi dep qarastyrady. Pekın ınklıýzıvti tetikter arqyly óńirlik qaýipsizdikti nyǵaıtyp, qaqtyǵystardyń aldyn alýǵa, al ekonomıka salasynda RCEP aıasyndaǵy ıntegratsııany tereńdetýge jáne Qytaı — ASEAN erkin saýda aımaǵynyń 3.0 nusqasyn iske asyrýdy jedeldetýge nıetti.
Dıplomatııalyq strategııada Ǵalamdyq Ońtústikke aıryqsha oryn berildi. Van I Qytaıdyń damýshy elderdi modernızatsııaǵa birlesip ilgeriletý úshin belsendirek biriktiretinin atap ótti.
Ol sondaı-aq modernızatsııa batystandyrýmen teń emes ekenin erekshe aıtty.
Osy turǵyda BRIKS Pekın úshin qalyptasyp kele jatqan kóppolıarly álemde damýshy memleketterdiń múddelerin qorǵaýdyń negizgi platformasy retinde qarastyrylady.
Mınıstr Afrıkamen seriktestikti tereńdetý jospary týraly aıtyp, nóldik kedendik baj rejımin engizýdi, Qytaı — Arab memleketteri ekinshi sammıtin ótkizýdi, sondaı-aq Parsy shyǵanaǵy elderiniń yntymaqtastyq keńesimen erkin saýda týraly kelissózderdi jedeldetýdi josparlap otyrǵanyn habarlady. Sonymen qatar Pekın Latyn Amerıkasy elderiniń egemendigin qorǵaýǵa qoldaý kórsetetinin rastady.
Van I Qytaıdyń Dúnıejúzilik saýda uıymynyń ortalyq rólin moıyndaı otyryp, kópjaqty saýda júıesine adaldyǵyn taǵy bir márte atap ótti.
Sondaı-aq Qytaıdyń 2026 jyly ATES-ke tóraǵalyǵy óńirlik ekonomıkalyq ıntegratsııany ilgeriletý úshin paıdalanylatynyn aıtty.
SІM basshysy jahandyq basqarýdy reformalaý qajettigin erekshe atap ótip, Qytaıdyń Birikken Ulttar Uıymynyń rólin nyǵaıtý jáne Ǵalamdyq Ońtústik elderiniń halyqaralyq ınstıtýttardaǵy ókildigin keńeıtý úshin dáıekti túrde áreket etetinin málimdedi.
Buǵan deıin Qytaı 2026 jyly bıýdjettik shyǵysty arttyratyny týraly jazǵan edik.
