Qytaı 2025 jylǵy basty ǵylymı jetistikterin jarııalady
ASTANA. KAZINFORM – Qytaı 2025 jyldyń qorytyndysy boıynsha negizgi ǵylymı-tehnıkalyq jetistikterin tanystyrdy, dep habarlaıdy Kazinform agenttiginiń menshikti tilshisi.
Bul týraly Beıjińde ótken jyl saıynǵy «Chjýngýantsýn» forýmynyń ashylýynda Qytaıdyń memlekettik jaratylystaný ǵylymdary qory málimdedi.
Bıyl forým «Tehnologııalyq jáne ónerkásiptik ınnovatsııalardy tereń yqpaldastyrý» taqyrybymen ótip jatyr. 25-29 naýryz aralyǵynda uıymdastyrylǵan alań irgeli zertteýlerdi naqty óndiriste qoldanýǵa baǵyttalǵan.
2025 jyldyń basty ǵylymı nátıjeleriniń qatarynda «Chane-6» mıssııasy arqyly alynǵan Aıdyń arǵy betiniń topyraǵyn zertteý erekshe ataldy. Bul zertteý alǵash ret Aıdyń arǵy betiniń evolıýtsııasyn túsindirýge múmkindik berdi.
Sondaı-aq jańa býyn elektronıkasy men kvanttyq tehnologııalarǵa arnalǵan asa juqa ári ıkemdi almaz qabyqshalaryn jappaı óndirýdiń ınnovatsııalyq ádisi usynyldy.
Budan bólek, EAST termoıadrolyq reaktory 100 mln gradýs temperatýrada 1066 sekýnd boıy turaqty jumys istep, mańyzdy ǵylymı nátıjege qol jetkizdi.
Qor dırektory Doý Sıankannyń aıtýynsha, Qytaıda jyl saıynǵy eń úzdik on ǵylymı jetistikti irikteý tájirıbesi 2005 jyldan beri júrgizilip keledi. Bıyl fınalıster 600-den astam irgeli zertteý jobasynyń arasynan tańdalǵan.
Buǵan deıin Qytaı ǵalymdary bolattan 10 ese berik kómirtekti talshyq ázirlegeni habarlanǵan bolatyn.