Qytaı 20 japon uıymyn eksporttyq baqylaý tizimine qosty

ASTANA. KAZINFORM — QHR Saýda mınıstrligi seısenbi kúni Mitsubishi Heavy Industries Shipbuilding Co. kompanııasy da kiretin 20 japon uıymyn eksporttyq baqylaý tizimine qosý týraly sheshim qabyldaǵanyn habarlady. Bul týraly Sınhýa jazdy.

Bul sheshimniń sebebi — ulttyq qaýipsizdik pen múddelerdi qorǵaý, sondaı-aq, taralýyn boldyrmaý sııaqty halyqaralyq mindettemelerdi oryndaý qajettigi bolyp otyr.

— Eksporttaýshylarǵa atalǵan uıymdarǵa ekijaqty (qoldanysy áskerı jáne beıbit maqsattarǵa jaramdy) taýarlardy eksporttaýǵa tyıym salynady. Sondaı-aq, sheteldik uıymdar men jeke tulǵalarǵa Qytaıda óndirilgen ekijaqty taýarlardy atalǵan uıymdarǵa berý nemese jetkizýge bolmaıdy. Qazirgi ýaqytta júzege asyrylyp jatqan barlyq sáıkes áreket dereý toqtatylýy tıis, — delingen vedomstvo habarlamasynda.

Seısenbi kúni QHR Saýda mınıstrligi baqylaý tizimine SUBARU korporatsııasyn da qosqan 20 japon uıymyn engizdi. Olarǵa qatysty taýarlardyń sońǵy paıdalanýshylary men qoldaný maqsattaryn tekserý múmkin bolmaǵan.

Mınıstrlik baqylaý tizimine engizilgen uıymdar úshin ekijaqty taýarlardy sońǵy paıdalanýshy men qoldaný maqsatyn qatań baqylaýǵa alady. Japon áskerı paıdalanýshylaryna, áskerı maqsattarǵa nemese Japonııanyń áskerı áleýetin kúsheıtetin basqa paıdalanýshylar men maqsattarǵa qatysty eksportqa eshqandaı ruqsat berilmeıdi.

Mınıstrliktiń resmı ókili málimdegendeı, atalǵan sharalar QHR-dyń eksporttyq baqylaý zańy jáne ekijaqty taýarlardy baqylaý týraly erejelerge sáıkes qabyldanǵan.

Onyń aıtýynsha, bul sharalardyń maqsaty — Japonııanyń remılıtarızatsııasyn jáne ıadrolyq qarýǵa ıe bolýǵa umtylysyn toqtatý bolyp esepteledi. Ókil bul sharalar tolyq zańdy, aqylǵa qonymdy jáne negizdi ekenin atap ótti.

Resmı ókildiń aıtýynsha, Qytaıdyń zańdy áreketteri tek azdaǵan japon uıymdaryna qatysty jáne bul sharalar tek ekijaqty taýarlarǵa qoldanylady.

Bul sheshim Qytaı men Japonııa arasyndaǵy qalypty saýda-ekonomıkalyq qatynastarǵa áser etpeıdi. Zańǵa sáıkes áreket etetin jáne adal jumys jasaıtyn japon uıymdary úshin eshqandaı alańdaýshylyq týyndamaıdy.

Osyǵan deıin Qytaıda pırotehnıkalyq ónimderdiń qaýipsizdigine baqylaý kúsheıtiletini belgili boldy.