Qytaı 16 jylda alǵash ret mobılızatsııa týraly zańyn jańartty
ASTANA. KAZINFORM – Qytaıda «QHR-dyń ulttyq qorǵanys mobılızatsııasy týraly» zańynyń jańartylǵan nusqasy 1 qazannan bastap kúshine endi. Bul týraly Beıjińdegi Kazinform agenttiginiń menshikti tilshisi jergilikti bılik organdaryna silteme jasap habarlaıdy.
2010 jyldan beri alǵash ret jańartylǵan zań eldiń áskerı rezervin jasaqtaý júıesin ózgertti. Endi áskerı esep derekteri turaqty jańartylyp, qajet bolǵan jaǵdaıda azamattyq saladaǵy mamandar da áskerı rezervke tartylady. Osylaısha, burynǵy «rezervıster» júıesiniń ornyna rezervti turaqty qalyptastyryp, qajet kezde tolyqtyryp otyratyn jańa tártip ornyqty.
Qytaıda alǵash ret bolashaǵy zor baǵyttardaǵy mobılızatsııalyq kúshterdi damytý zańmen bekitilip, ozyq tehnologııalar men ınnovatsııalyq ázirlemelerdi qorǵanys salasyna engizý kózdelgen.
Sonymen qatar kásibı-tehnıkalyq mamandardy daıarlaý jáne esepke alý tártibi jańartylady. Budan bylaı mamandardy tek ákimshilik-aýmaqtyq qaǵıdat boıynsha emes, salalyq jáne óndiristik júıeler negizinde esepke alý qarastyrylǵan. Bul strategııalyq rezervti qajetti mamandarmen tolyqtyrady jáne tıisti resýrstardy jedel jumyldyrýǵa múmkindik beretin tetikterdi qalyptastyrady.
Jańartylǵan zań azamattar men uıymdardyń quqyqtaryn qorǵaýǵa da basymdyq beredi. Mobılızatsııa kezinde arnaıy sharalardy qoldanýda qajettilik pen tepe-teńdik qaǵıdaty belgilenip, alynǵan nemese paıdalanylǵan resýrstar úshin ádil ótemaqy tóleý kepildigi qarastyrylǵan.
Zań jobasyn ázirleýshilerdiń pikirinshe, ózgerister ulttyq qorǵanys júıesin jańǵyrtyp, qoldanystaǵy zańnamany zamanaýı tehnologııalyq talaptarǵa beıimdeýge jáne ulttyq qaýipsizdikti qamtamasyz etý tetikterin jetildirýge baǵyttalǵan.
Buǵan deıin Qytaıdyń 2026 jyly qorǵanys shyǵyndaryn 7 paıyzǵa arttyratyny habarlanǵan bolatyn.
