Qytaı 13 jyl qatarynan onlaın-rıteıldiń eń iri naryǵy mártebesin saqtap otyr

ASTANA. KAZINFORM — Qytaı elektrondyq kommertsııa naryǵy kólemi boıynsha álemde eń iri el mártebesin 13 jyl qatarynan saqtap keledi, dep habarlaıdy Kazinform menshikti tilshisi Xinhua agenttigine silteme jasap.

Búkilqytaılyq elektrondyq kommertsııa máseleleri jónindegi jumys keńesinde jarııalanǵan derekterge sáıkes, eldegi jyldyq tsıfrlyq tutyný kólemi 23,8 trln ıýanǵa (shamamen 3,39 trln AQSh dollary) jetken. «Jibek jolynyń elektrondyq kommertsııasy» bastamasy aıasynda seriktes elder sany 36 memleketke deıin artqan.

Sońǵy bes jylda Qytaıdyń elektrondyq kommertsııa sektory joǵary sapaly damý modeline kóship, ekstensıvti ósimnen tehnologııalyq ınnovatsııalar men sapa standarttaryn arttyrýǵa basymdyq berdi.

Sala ónerkásipti jańǵyrtýdyń, jumys oryndaryn qurýdyń, sondaı-aq baǵdarlamalyq qamtamasyz etý, bultty esepteýler jáne úlken derekterdi óńdeý salalaryndaǵy qyzmetterdi keńeıtýdiń negizgi qozǵaýshy kúshteriniń biri bolyp otyr.

Qazirgi tańda Qytaıdyń elektrondyq kommertsııa sektorynda 78 mıllıonnan astam adam jumyspen qamtylǵan. Baılanysty salalardyń qarqyndy damýy logıstıka sektoryndaǵy statıstıkamen de rastalady: sońǵy bes jylda jedel jetkizý kóleminiń ortasha jyldyq ósimi shamamen 20 paıyzdy quraǵan.

Buǵan deıin Qytaı strımıng arqyly satýlar men onlaın-saýdaǵa baqylaýdy kúsheıtip jatqany habarlanǵan bolatyn.