Qytaı 10 myń metr tereńdikte materıaldardy synaý boıynsha 537 kúndik zertteýdi aıaqtady
ASTANA. KAZINFORM — Qytaı memlekettik keme jasaý korporatsııasy tereń sý jaǵdaıyndaǵy korrozııaǵa tózimdi materıaldardy synaý boıynsha 537 kúnge sozylǵan zertteýdiń aıaqtalǵanyn habarlady, dep habarlaıdy Xinhua.
Korporatsııa málimetinshe, zertteý 10 myń metr tereńdikte júrgizilip, mundaı synaqtar arasyndaǵy uzaqtyǵy boıynsha jańa rekord ornatqan.
Synaq joǵary qysym, tómen temperatýra, tuzdylyqtyń joǵarylyǵy jáne erigen otteginiń óte az mólsheri sııaqty ekstremaldy jaǵdaılarda ótken.
Korporatsııa ókilderiniń aıtýynsha, zertteý toby energııany óte az tutynatyn tıimdi basqarý júıesin, sondaı-aq tereń sýdaǵy korrozııadan qorǵaıtyn arnaıy júıeni ázirlegen.
Bul tehnologııalar jabdyqtardy dál ornalastyrýǵa, olardyń senimdi jumysyn qamtamasyz etýge jáne tereń sý ortasynan tolyq shyǵarýǵa múmkindik beredi. Synaq barysynda jınalǵan barlyq derek saqtalyp, úlgiler sý betine zaqymdanbaı shyǵarylǵan.
Korporatsııanyń aǵa ǵylymı qyzmetkeri Lıao Chjıtsıan mundaı uzaq merzimdi synaq kezinde alynǵan derekter álemdik tájirıbede sırek kezdesetinin atap ótti.
Zertteý nátıjelerin tereń sýdaǵy barlaý jumystaryna, paıdaly qazbalardy óndirýge jáne munaı-gaz ken oryndaryn ıgerýge paıdalaný josparlanyp otyr.
Buǵan deıin Qazaqstan men Qytaı ǵaryshkerlerdiń birlesken ushýlary salasyndaǵy yntymaqtastyqty talqylaýy múmkin ekeni habarlanǵan bolatyn.
