Kitap dúkenderinde satylyp jatqan kitaptardyń 10 paıyzy ǵana qazaq tilinde
ALMATY. 4 qarasha. QazAqparat /Erlik Erjanuly/ - Biz táýelsiz el bola turyp, kórshi memleketterdiń aqparattyq jáne mádenı bodanyna aınalyp bara jatyrmyz. Ony "Altyn qalam" táýelsiz ádebı baıqaýyn uıymdastyrýshylar búgin Almatyda ótkizgen baspasóz máslıhatynda aıtty.
"Kitap dúkenderinde qazaq tildi basylymdar áli de tapshy bolyp otyr. Bizdiń "Altyn qalam" osy olqylyqty joıýdy kózdeıtin alǵashqy baıqaý deýden aýlaqpyz. Biraq oǵan óz úlesimizdi qosýdy kózdedik. Mamyr aıynda kóterilgen bul baıqaý kezinde qyrkúıek aıyna deıin www.arzu.kz saıtyna 75 avtordyń 92 shyǵarmasy kelip tústi. Ǵalamtorǵa qol jetimdiliktiń tómendigine qaramastan, úmitkerler Almaty men Astanadan ǵana emes respýblıkanyń barlyq óńirin qamtyp otyr. Bul bizdi erekshe qýantyp otyr",- deıdi "Eksklıýzıv" jýrnalynyń redaktory, saıasattanýshy Rasýl Jumaly.
Al GSM Qazaqstan/Kcell kompanııasynyń korporatıvtik dırektory Aıda Dosaevanyń aıtýynsha, kitap sórelerinde qazaqstandyq avtorlardyń kitaptarynyń azdyǵy elimizde talantty adamdar joq degen sóz emes. Biz olardy bilmeımiz jáne olardyń óz shyǵarmalaryn oqyrman nazaryna usynatyn alańqaılary joq.
Ádebı syılyqty uıymdastyrýshylardyń sózine qaraǵanda, úmitker avtorlardyń basym bóligi oqyrman qaýymǵa tanymal emes jańa esimder. Aqtyq synǵa myna týyndylar shyǵyp otyr. "Jyldyń úzdik poezııasy" atalymy boıynsha - "Seni súıý" (Aqberen Elgezek), "Tastaǵy óleń" (Baqytjan Aldııar), "Myna álemge kerek aýa" (Tanakóz Іlııasova), "Soqyr akkordeonshy" (Serik Saǵyntaı).
"Eń úzdik proza" atalymy boıynsha - "Kósh" áfsana (Dýman Ramazan), "Tozaqta ótken bir tún" fantastıkalyq povest (Oralbek Besbolat), "Túnekke jutylǵan túngi ottar (Zarıa Jumanova), "Poshtashy Jaýlybaı nemese án daýyly soqqan kesh "(Ereken Qorabaı), "Kıe" ( Baqytkúl Babash).
"Úzdik balalar shyǵarmasy" - "Bolmaǵan balalyq shaq" (Aqberen Elgezek), "Ádep" (Qalqaman Sarın), "Álippe, óleń jazdym qyryq eki áripke"(Jarken Manarbaı), dramatýrgııa - "Minezdeme" (Erkin Tákebaev), "Qandy azý" (Baıǵalı Esenálıev) , "Qadir túni" (Madına Omarova).
Bulardyń arasynan eń úzdik dep tanylǵan avtorlardyń esimi 8 qarasha kúni belgili bolady dep josparlanyp otyr.
