Qystyń sońǵy kúni qaı joldarda qozǵalys shekteldi

ALMATY. KAZINFORM — «QazAvtoJol» ulttyq kompanııasy eldegi joldardyń qazirgi ahýaly týraly habarlady.

Ulttyq kompanııanyń málimetinshe, qolaısyz aýa raıyna baılanysty respýblıkalyq mańyzy bar kelesi joldar jabyq tur:

Qyzylorda oblysy

• «Qyzylorda — Jezqazǵan — Qaraǵandy — Shiderti», 12-216-shaqyrym (Qyzylorda qalasy — Ulytaý oblysy shekarasy).

Ulytaý oblysy

• «Qyzylorda — Jezqazǵan — Qaraǵandy — Shiderti» 216-424-shaqyrym (Qyzylorda oblysy shekarasy — Jezqazǵan qalasy).

Abaı oblysy

• «Qaraǵandy — Aıagóz — Tarbaǵataı — Bogas» 320-528-shaqyrym (Qaraǵandy oblysy shekarasy — Barshatas aýyly).

Jambyl oblysy

• «RF shekarasy — Martók — Aqtóbe — Qarabutaq — Qyzylorda — Shymkent — Taraz — Qordaı — Almaty — Qorǵas — QHR shekarasy» avtojolynyń «Qordaı asýynyń jańa aınalma joly» ýchaskesi, 159-238-shaqyrym (Kenen aýyly — Qaınar aýyly).

Pavlodar oblysy

* «Astana — Shiderti — Pavlodar — Ýspenka — RF shekarasy» avtojolyndaǵy «Qalqaman» jolaıryǵy ýchaskesinde (Qalqaman kentine kireberis pen Astana baǵytyna shyǵar jol) qozǵalys shektelgen.

Sonymen qatar Shyǵys Qazaqstan oblysyndaǵy Osınov asýynda tirkemesi bar jáne jartylaı tirkemeli júk kólikteriniń qozǵalysy ýaqytsha shekteldi. Shekteý «Óskemen — Altaı — Katonqaraǵaı — Rahman qaınary» avtojolynyń 46-66-shaqyrymyndaǵy (Severnoe aýyly — Serebrıansk qalasy) ýchaskesinde qys aıaqtalǵansha saqtalady.

Eske salaıyq, buǵan deıin sınoptıkter 28 aqpanda eldiń birneshe óńirinde boran, tuman, kóktaıǵaqqa baılanysty eskertý jasaǵan edi.