Qysta kólikti jylytý kezinde qandaı qaýipsizdik erejelerin saqtaý kerek

ASTANA. KAZINFORM – Kún sýytqan kezde avtokólikterde órt shyǵý qaýpi artady. Osyǵan baılanysty Tótenshe jaǵdaılar mınıstrligi júrgizýshilerge kólikti jylytý kezinde qaýipsizdik talaptaryn qatań saqtaýdy eskertti.

kólikti jylytý
Foto: Gov.kz

Mınıstrlik málimetinshe, qys mezgilinde júrgizýshiler kólikterin jıi jylytady. Alaıda elektr symdarynyń aqaýy, janarmaıdyń aǵýy nemese jylytý qurylǵylaryn durys paıdalanbaý órtke ákelýi múmkin.

Sondyqtan tótenshe jaǵdaılardyń aldyn alý úshin kóliktiń tehnıkalyq jaǵdaıyn únemi baqylap, qaýipsizdik erejelerin saqtaý qajet.

– Elektr symdarynyń, akkýmýlıatordyń jáne janarmaı júıesiniń jaramdylyǵyn únemi tekserińiz. Qozǵaltqyshy qosýly turǵan kólikti qaraýsyz qaldyrmańyz. Kólikti jylytý úshin ashyq otty jáne qoldan jasalǵan qurylǵylardy paıdalanbańyz. Tıisti jeldetý júıesi joq jabyq garajda kólikti jylytpańyz, – delingen mınıstrlik habarlamasynda.

Sonymen qatar TJM mamandary júrgizýshilerge kólikte jaramdy órt sóndirgish ustap, ony qoldaný tártibin aldyn ala meńgerýge keńes beredi.

Qozǵaltqysh bóliginde janǵysh materıaldardyń jınalýyna jol bermeý jáne avtokólikke ýaqytyly tehnıkalyq qyzmet kórsetý de mańyzdy.

Eger kólikten kúıik ıisi shyǵyp, tútin nemese órt belgileri baıqalsa, júrgizýshi dereý kólikti toqtatyp, qozǵaltqyshty óshirýi kerek. Odan keıin salonnan shyǵyp, 101 nemese 112 nómirine habarlasý qajet.

Vedomstvo órt qaýipsizdigi erejelerin saqtaý azamattardyń ómiri men múlkin qorǵaýǵa kómektesetinin eske saldy.

Aıta keteıik, buǵan deıin Qazaqstanda jyl basynan beri 373 avtokólik órtengeni habarlanǵan bolatyn. Mamandar órttiń negizgi sebepteri retinde elektr júıesindegi aqaýlardy, janarmaı men maıdyń aǵýyn jáne qozǵaltqysh bólshekteriniń qyzyp ketýin ataǵan.