Qysta elektr energııasyn tutyný 18,2 myń MVt-qa jetýi múmkin - Aqkenjenov
ASTANA. KAZINFORM – Ákimdikter energııa kózderi aldyndaǵy debıtorlyq bereshekti óteý boıynsha sharalar qabyldaıdy. Bul týraly Úkimet otyrysynda Energetıka mınıstri Erlan Aqkenjenov aıtty.
- Osy jyldyń 10 aıynda elektr energııasyn óndirý kólemi 102 mlrd kVt·saǵatty qurady. Bul ótken jyldyń sáıkes kezeńindegi kórsetkishten 2,3% joǵary. Aǵymdaǵy kúzgi-qysqy kezeńde eń joǵary júkteme 18 200 MVt-qa jetedi dep boljanady. Bul ótken jylytý maýsymyndaǵy eń joǵary kórsetkishten 3% artyq, - dedi Erlan Aqkenjenov.
Onyń málimetinshe, energııa kózderiniń otyn qoımalarynda 5,8 mln tonna kómir jáne 137 myń tonna mazýt jınaqtaldy. Barlyq stantsııa otynnyń normatıvtik qorymen qamtamasyz etilgen.
- Mınıstrlik 255 myń tonna kóleminde «áleýmettik» mazýt jetkizý kestesin bekitti. Mazýtty jóneltý osy jyldyń qyrkúıek aıynan bastap júrgizilip jatyr. Osyǵan baılanysty óńirlerdiń ákimdikterine atalǵan kesteniń oryndalýyn jedeldetý qajet, - dedi ol.
Mınıstrdiń aıtýynsha, debıtorlyq bereshekti azaıtý jónindegi arnaıy komıssııa quryldy. Búgingi tańda jalpy bereshek kólemi 11% tómendep, 72 mlrd teńgeni qurady.
- Sonymen qatar birqatar júıeli sharalar ázirlendi. Atap aıtqanda, bereshekti óteý kesteleri bekitildi. Sondaı-aq jyl sońyna deıin ákimdikter energııa kózderi aldyndaǵy debıtorlyq bereshekti óteý boıynsha sharalar qabyldaıtyn bolady. Joǵaryda atalǵan sharalardyń barlyǵy energııa kózderiniń jetkizilgen gaz úshin bereshegin edáýir azaıtýǵa múmkindik beredi. Jalpy, bul baǵyttaǵy jumys jalǵastyrylatyn bolady, - dedi ol.
Aıta keteıik, elimizde energetıka nysandaryndaǵy tehnologııalyq buzýshylyqtar 6%-ǵa azaıdy.
