Qysta demalýǵa laıyq 13 taý shańǵy kýrorty
ASTANA.KAZINFORM — Qysqy maýsym bastalysymen Qazaqstannyń ár óńirindegi taý shańǵy kýrorttary týrıster úshin óz esigin aıqara ashty. Búginde el aýmaǵynda shańǵy, snoýbord jáne basqa da qysqy belsendi demalys túrlerine arnalǵan 13 baǵyt jumys isteıdi. Bul týraly Mádenıet jáne aqparat mınıstrligi málim etti.
Almaty qalasynyń mańy
Shymbulak — elimizdegi eń tanymal taý shańǵy kýrorttarynyń biri. Munda jalpy uzyndyǵy 20 shaqyrymǵa jetetin ártúrli deńgeıdegi trassalar, aspaly joldar jáne jalǵa berý pýnktteri bar. 2023 jyly álemdegi eń bıik túngi taý shańǵy trassasy retinde Gınnestiń rekordtar kitabyna engen.
Qosymsha múmkindikter: zıplaın, atpen serýendeý, paraplanmen ushý, konkı tebý.
Pioneer otbasylyq taý kýrorty — ulttyq park aýmaǵynda, 2000 metrden joǵary bıiktikte ornalasqan. Trassalardyń jalpy uzyndyǵy — 3 000 metr. Áýesqoılarǵa da, tájirıbeli sportshylarǵa da qolaıly. Kýrort jyl boıy jumys isteıdi. Munda tabıǵı marshrýttar, otbasylyq baǵdarlamalar, qural-jabdyqtardy jalǵa alý qyzmeti bar.
Almaty oblysy
Oi-Qaragai — tórt maýsymdyq otbasylyq taý kýrorty. Munda jalpy uzyndyǵy 28 shaqyrymdy quraıtyn 15 trassa bar. Aýmaǵynda meıramhanalar, qonaq úıler jáne oıyn-saýyq alańdary jumys isteıdi.
Qosymsha: arqandy park, at sporty ortalyǵy, sadaq atý, peıntbol, ekskýrsııalar.
«Aq Bulaq» — bıik taýly aımaqta ornalasqan, ártúrli daıyndyq deńgeıine arnalǵan trassalar men frıraıd baǵyttaryn usynady. Trassalardyń uzyndyǵy 2 500 metrge deıin jetedi.
Qosymsha: saýyqtyrý baǵdarlamalary, kvadrotsıklder.
Aqmola oblysy
Orman Ski Resort (Şýche-Býrabaı kýrortty óńiri) — jalpy uzyndyǵy 800 metrge jetetin ártúrli kúrdeli trassalar, kótergishter, keshki jaryqtandyrý, jalǵa berý pýnkti jáne nusqaýshylar mektebi bar keshen.
Belsendi demalys túrleri: shańǵy, snoýbord, tıýbıng, qarda júretin kólikter, shanamen syrǵanaý, qaraǵaıly ormanda serýendeý.
Elikti Park — Kókshetaý qalasynan 25 shaqyrym jerdegi Zerendi aýdanynda ornalasqan. Uzyndyǵy 4 shaqyrymǵa jetetin trassalar, býgeldi jáne oryndyqty kótergishter, jabdyqtardy jalǵa berý qyzmeti bar.
Belsendilikter: taý shańǵysy, snoýbord, tıýbıng, konkı tebý, taza aýadaǵy serýen.
«Nurtaý» bazasy (Şýche-Býrabaı kýrortty óńiri). Munda uzyndyǵy 800 metrlik trassa, aspaly jol jáne tıýbıngke arnalǵan syrǵanaq tóbeshikter bar.
Shyǵys Qazaqstan oblysy
Óńirde 4 taý shańǵy orny jumys isteıdi.
«Altaı Alpisi» — Óskemen qalasynan 24 shaqyrym jerde ornalasqan kýrort. Munda uzyndyǵy 4 500 metrge deıin jetetin 12 eńis bar. Maýsym qarashadan sáýirge deıin jalǵasady.
Qosymsha: nusqaýshylar qyzmeti, jabdyqtardy jalǵa alý, pantamen emdeý, monsha, balyq aýlaý, atpen serýendeý, arqandy park.
«Nurtaý» — oblys ortalyǵynan 35 shaqyrym jerde ornalasqan. Qonaqtarǵa eki negizgi jáne bir eńisi bar. Sondaı-aq frıraıd aımaqtar men oryndyqtar jumys isteıdi. Trassalardyń uzyndyǵy — shamamen 2 000 metr. Aýmaqta kottedj qalashyqtary men balalarǵa arnalǵan ortalyq bar.
Qosymsha: tıýbıng, monsha, ot jaǵý alańy, qarda júretin kóliktermen ekskýrsııalar.
Rıdder qalasynyń mańy
Stardust Camp — Joǵary-Haırýzovka aýylynda ornalasqan. Uzyndyǵy 1 000 metrlik býgeldi kótergish, tıýbıng, qonaq úı men glempıngte ornalastyrý múmkindigi bar.
«Edelveıs» — ártúrli deńgeıdegi trassalar, onyń ishinde slalomǵa arnalǵan sertıfıkattalǵan baǵyttar bar. Jalpy uzyndyǵy — shamamen 1 300 metr.
Qosymsha: taýly joryqtar, konkı tebý.
Túrkistan oblysy
«Alataý» tórt maýsymdyq kýrorty — Tólebı aýdany Nysanbek aýylynda ornalasqan. Qysta shańǵy, snoýbord, tıýbıng jáne qarda júretin kólikter qoljetimdi. Trassalardyń jalpy uzyndyǵy — 1 800 metr.
Qosymsha: qarda serýendeý, atpen serýendeý, otbasylyq baǵdarlamalar.
Pavlodar oblysy
«Myrzashoqy» taý shańǵysy bazasy — Qarajar aýylynyń mańynda ornalasqan. Uzyndyǵy 960 metr bolatyn shańǵy trassalary men aspaly jol bar. Bazada túneý qarastyrylmaǵan.
Qosymsha: tıýbıng, taza aýada serýendeý, qarda júretin kólikter, qysqy pıknıkter men ekskýrsııalar.
Týrızm jáne sport mınıstrligi qysqy týrızm salasyndaǵy ulttyq standarttardyń tizbesin jergilikti atqarýshy organdarǵa joldady. Sonymen qatar qysqy maýsymda ýákiletti memlekettik organdarmen birlesip profılaktıkalyq is-sharalar ótkizilip, kóshpeli monıtorıngtik tekserýler josparlanǵan.
Tekserý barysynda taý shańǵysy trassalary men kótergishterdiń jaǵdaıy, qaýipsizdik jáne sanıtarlyq talaptardyń saqtalýy, sondaı-aq týrıstik ınfraqurylymnyń ulttyq standarttarǵa sáıkestigi baǵalanyp, demalýshylardyń qaýipsizdigi men jaılylyǵy qamtamasyz etiledi.
Buǵan deıin Almatyda 5 myńnan astam jumys ornyn ashatyn Almaty Superski jańa taý shańǵysy kýrorty salynatynyn jazdyq. Jańa taý shańǵysy kýrorty aımaqqa shetelden jańadan úırenip júrgen shańǵyshylar men týrısterdi tartýǵa baǵyttalǵan.