Qysta da SPF jaǵý kerek pe — dermatolog pikiri

ASTANA. KAZINFORM — Qys kele qalsa, qyzdardy alańdatatyn basty jaıt — bet terisiniń qurǵaqtyǵy. Al salqyn jyl mezgilinde terini qalaı qorǵaý kerek? «Búgin LIVE» baǵdarlamasyna qonaq bolǵan dermatolog jaýap berdi.

— Eń birinshi, bólmedegi aýa tym qurǵaq bolmaý kerek. Qys kelip, jylý maýsymy bastalǵanda ádette bólmedegi ylǵaldylyq azaıady. Sol úshin túngi ýaqytta aýa ylǵaldandyrǵysh qosyp qoıý kerek. Ekinshi, terini únemi ylǵaldandyryp, krem jaǵýymyz qajet. Kremdi tańerteń jáne keshke jaqsaq bolady. Al negizi ár dýshtan, basseınnen shyqqan saıyn jáne qashan qolyńyz tıip, esińizge túskende bet terisin ylǵaldandyryp qoıý artyq etpeıdi. Sodan keıin, qazirgi kosmetologııanyń damyǵan zamanynda túrli egý protsedýralaryn júrgizsek bolady. Arnaıy gıalýron qyshqylynyń kómegimen terini ylǵaldandyra alamyz, — deıdi Gúldana Jaqypbek.

Maman bet kútimine arnalǵan kosmetıkalardy qalaı tańdaý keregin aıtty.

— Bet kútimine arnalǵan kosmetıka tańdar aldynda dermatolog-kosmetolog mamandarmen keńesken jón. Dermatolog ár naýqastyń teri tıpine qaraı qandaı ónimderdi qoldaný keregin naqty aıta alady. Sol úshin ár adam jeke-jeke keńes alǵan jón, — deıdi ol.

Al qyz-kelinshekterdiń basty suraǵy — qysta SPF krem jaǵý kerek pe?

— SPF kremin ádette betke daq túspes úshin, kúnnen qorǵaný úshin paıdalanamyz. Ekinshi, teridegi qaterli isiktiń aldyn alý maqsatynda da jaǵamyz. Onyń syrtynda jazylyp turatyn +30, +50 degen aqparat — jaı marketıng. Olardyń kúnnen qorǵaý qabileti shyn máninde birdeı. Ony da óz teri tıpińizge qaraı tańdaısyz. ıAǵnı, sizdiń terińizge qaısysy yńǵaıly bolsa, soǵan qaraı alý kerek. Al qysqy ýaqytta aqquba adamdar SPF jaǵý kerek. Naqty aqparatty óz fototıpińizge qaraı keńes alyp bile alasyz, — deıdi dermatolog.

Aıta keteıik, Qytaı ǵalymdary qandaǵy qant deńgeıiniń tómendeýin qamtamasyz etetin jáne dástúrli ınektsııalar áserimen salystyrýǵa bolatyn ınvazıvti emes ınsýlındi teri arqyly jetkizýdiń jańa tehnologııasyn oılap tapty.