Qysqy jasóspirimder Olımpıadasynda el namysyn 42 sportshy qorǵaıdy
Qazaqstandyq sportshylar 2024 jyldyń 19 qańtary men 1 aqpany aralyǵynda Ońtústik Koreıanyń Kanvon qalasynda ótetin IV qysqy jasóspirimder Olımpıadasyna 30 lıtsenzııa jeńip aldy, dep habarlaıdy Kazinform.
QR Ulttyq olımpıadalyq komıteti málim etkendeı, jasóspirimder quramasy jeti sport túriniń beseýinen el namysyn qorǵamaq.
Osyǵan oraı, búgin Astanada Ulttyq Olımpıada komıteti (QR UOK) men Qazaqstan Týrızm jáne sport mınıstrliginiń birlesken jıyny ótip, ulttyq qurama komandanyń aldaǵy qysqy jasóspirimder Olımpıadasyna qatysý máselesi qaraldy.
Jumys otyrysy jaqynda Týrızm jáne sport mınıstrligi men Ulttyq Olımpıada komıteti birlese ashqan jedel ortalyqta ótti. Ortalyqta jas sportshylardyń Kanvondaǵy nátıjelerine jedel monıtorıng jasalady. Keıin atalǵan Jedel ortalyq 2024 jylǵy Parıj Olımpıadasyna daıyndyq kezeńinde jumys istemek.
2024 jylǵy jasóspirimderdiń qysqy Olımpıadasyna qurama komandanyń daıyndyǵy týraly vedomstvo basshylary, bas bapkerler men memlekettik jattyqtyrýshylar málimdep, qazirgi tańda jasóspirimder quramasy daıyndyqtyń sońǵy kezeńin ótkizip jatqanyn habarlady.
«Ońtústik Koreıadaǵy jasóspirimder Olımpıadasynda Qazaqstan namysyn sporttyń bes túri men 10 dıstsıplına boıynsha 42 sportshy qorǵaıdy. Atap aıtar bolsaq, bıatlon, kerlıng, konkımen júgirý, short-trek, shaıbaly hokkeı, shańǵy jarysy, shańǵymen tuǵyrdan sekirý, shańǵy qossaıysy, taý shańǵysy, frıstaıldan paralleldi mogýl boıynsha baq synaıdy. Bizdiń sportshylar 30 joldama jeńip aldy. 2020 jyly Lozannada ótken qysqy jasóspirimder Olımpıadasymen salystyrǵanda alǵa jyljý baıqalady. Óıtkeni tórt jyl buryn bizdiń qurama tórt sport túri boıynsha 26 atletti jarysqa qosqan bolatyn. Odan bólek, Kanvon-2024 qysqy oıyndarynda ulttyq qurama jetistikke jetetin áleýetke ıe dep senimmen aıta alamyn», - dedi jıynda sóz alǵan QR UOK bas hatshysy Andreı Krıýkov.
Esterińizge sala keteıik, IV qysqy jasóspirimder Olımpıadasy bıyl 19 qańtar men 1 aqpan aralyǵynda Ońtústik Koreıanyń Kanvon qalasynda ótedi. Al Frantsııanyń Parıj qalasynda XXXIII jazǵy Olımpıada osy jyldyń 26 shildesi men 11 tamyzy aralyǵynda ótse, HVІІ Jazǵy Paralımpıada bıyl 28 tamyz - 8 qyrkúıek aralyǵynda ótedi.
