Qysqy ýnıversıadanyń saltanatty ashylý rásimi ótti
ASTANA. KAZINFORM — Búgin, 13 qańtarda Italııanyń Týrın qalasynda 2025 jylǵy Qysqy ýnıversıadanyń saltanatty ashylý rásimi ótti.
Saltanatty ashylý rásiminde el quramasynan tý ustap shyǵatyn qurmetine hokkeıshi Abylaıhan Súleımenov pen frıstaıl sheberi Aıaýlym Ámrenova ıe boldy.
Abylaıhan shaıbaly hokkeıden «Nomad» komandasynyń oıynshysy.
Ol budan buryn AQSh-ta ótken HHHІ Dúnıejúzilik qysqy ýnıversıadada elimizdiń hokkeı quramasy sapynda úshinshi oryndy ıelendi.
Al Aıaýlym Ámrenova — frıstaıl boıynsha 2017 jylǵy Eýropa kýbogy kezeńderiniń altyn, kúmis jáne qola medalin alǵan.
Qysqy Ýnıversıadaǵa Qazaqstan quramasy erekshe daıyndyq jasap keldi. Olar ústindegi kók tústi sporttyq formalarymen alań tórinen júrip ótti.
Jas sportshylar 11 sport túri boıynsha baq synaıdy. Qazaqstan quramasynan 103 sportshy qatysady. Olar bıatlon, short-trek, shańǵy jarysy, mánerlep syrǵanaý, qysqy sporttyq baǵdarlaý, frıstaıl, taý shańǵysy, erler jáne áıelder hokkeıi, sondaı-aq parashańǵy jarystary boıynsha synǵa túsedi.
Dúbirli dodaǵa álemniń 57 elinen 2000-nan astam sportshy qatysady. Jarys baǵdarlamasynda 11 sport túri boıynsha 96 medal jıyntyǵy sarapqa salynady.
Qazirge deıin Qysqy Ýnıversıadada qazaqstandyq sportshylar 98 medal enshilegen. Onyń ishinde 32-y altyn, 29-y kúmis, 37-i qola.
Aıta ketsek, Qazaqstan quramasy óz tarıhynda eń jaqsy nátıjeni 2017 jyly Almatyda ótken Ýnıversıadada kórsetti. Onda jalpy medaldar esebi boıynsha 36 medal (11 altyn, 8 kúmis jáne 17 qola) jeńip alyp, ekinshi orynǵa ıe bolǵan edi.
Sondaı-aq telearna 13-23 qańtar aralyǵynda ótetin stýdenttik sporttyq jarystardy kórsetý quqyǵyna ıe boldy.