Qysqy ýnıversıada: Qazaqstan quramasy short-trekten qola júldeni jeńip aldy

ASTANA. KAZINFORM – Italııanyń Týrın qalasynda ótip jatqan Qysqy ýnıversıadada Qazaqstan quramasy short-trekten qola júldeger atandy.

Qazaqstandyqtar 2 myń metrlik qashyqtyqta aralas synda asa tartysty básekede úzdik úshtikke ilikti. Atalǵan jarysta el namysyn Alına Ájiǵalıeva, Málıka Ermek, ıAna Han, Valerıı Klımenko jáne Dinmuhamedaldııar Tájibaı qorǵady. 

Qazaqstandyqtar 2:44.815 ýaqytpen máre syzyǵyn úshinshi bolyp qıdy. Ońtústikkoreıalyqtar chempıon atansa, qytaılyqtar kúmis júldege ıe boldy.

- Báseke óte joǵary boldy. Komanda bárine ázir edi. Birinshi orynǵa da talasýǵa bolar edi. Taktıkalyq, bálkim, dene daıyndyǵy jaǵynan sál jetpeı qaldy, - dedi jarystan keıin Alına Ájiǵalıeva.

Osylaısha, qazaqstandyqtar ýnıversıadada 13-inshi medaldi jeńip aldy.

Sársenbi kúni sondaı-aq erler men áıelder arasynda short-trekten 500 metr qashyqtyqta medaldar sarapqa salyndy. Onda qazaqstandyqtar júldege ilige alǵan joq.

Eske sala keteıik, budan buryn qysqy ýnıversıadada bıatlonshy Kırıll Baýerdiń qola júldeger atanǵanyn jazǵan bolatynbyz.