Qysqy Ýnıversıada: Hokkeıden Qazaqstan erler quramasy besinshi oryn aldy

ASTANA. KAZINFORM — Italııanyń Týrın qalasynda ótip jatqan Qysqy Ýnıversıadada shaıbaly hokkeıden Qazaqstan erler quramasy Chehııany jeńip, jalpy esepte besinshi orynǵa turaqtady.

Qazaqstandyq hokkeıshiler qarsylasynan 5:2 esebimen basym tústi. El quramasynan Oleg Boıko (22-mınýt), Beıbarys Orazov (31-mınýt), Denıs Chaporov (44-mınýt) ıjáne Semen Sımonov (54, 55-mınýttarda) mergendik tanytty. Oǵan qarsylastar tarapynan Djoshýa-Djeıms Maha (27-mınýt) jáne Iozef Hasman (33-mınýt) eki golmen jaýap qaıyrdy.

Qazaqstandyq hokkeıshiler A tobynda synǵa tústi. Qarsylastary — Kanada, Chehııa, Ońtústik Koreıa jáne Shvetsııa.

Aldymen Shvetsııany 9:2, Ońtústik Koreıany 7:1 esebimen jeńip, odan keıin Kanadaǵa 3:4, Chehııaǵa 1:3 esebimen jol berdi. Óz tobynda jeti upaımen úshinshi orynǵa turaqtady. 

Shırek fınalda qazaqstandyq hokkeıshiler Slovakııaǵa 1:2 esebimen jol berdi.

Al Qazaqstan áıelder quramasy jalpy esepte altynshy orynǵa turaqtady.