Qysqy týrızm: Aqmolada qys aılarynda qaıda demalýǵa bolady
Aqmola oblysy klımattyq faktorlar boıynsha qysqy týrızmdi damytýǵa qolaıly aımaqqa jatady. Şýche-Býrabaı jáne Zerendi kýrort aımaqtaryndaǵy týrıstik nysandar qys aılarynda ekotýrızm, sport jáne saýyqtyrý baǵyty boıynsha kelýshilerge qyzmet kórsetedi, dep habarlaıdy Kazinform.
Óńirde jumys istep turǵan qonaq úılerden bólek, kýrorttyq aımaqta qysqy týrızm qyzmetterin «Oqjetpes», «Almaz», «Şýchınskıı», S. Seıfýllın atyndaǵy, «Terrassalar parki», «Samal», «Dıskaverı Býrabaı», «Grand Prıks», «Zeren» tárizdi shıpajaılar usynady.
Qys mezgilinde týrıst tartý úshin shıpajaılarda jyl saıyn kórsetiletin qyzmetterdiń spektri keńeıip keledi.
Onyń ishinde muz aıdyndary quıylyp, shańǵy marshrýttary salynýda, sondaı-aq, shańǵy, konkı, snoýbord, qarda júretin kólikterdi jalǵa berý oryndary ashylyp jatyr.
Kásibı shańǵy áýesqoılary «Elikti park», «Nurtaý» jáne «Aq jelken» taý shańǵy kýrorty múmkindikterin paıdalanady.
Ekstremaldy áýesqoılar úshin «Rixos Borovoe» qonaq úıiniń aýmaǵynda «Ekstrım park» jumys isteıdi.
Týrısterdi qyzyqtyratyn oryn — «Býrabaı lend» oıyn-saýyq parki.
Ol qysqy oıyn-saýyqtyń búkil spektrin usynady (haskı shana, atpen serýendeý, shanamen syrǵanaý, konkı tebý, kvadratsıkl, qarda júretin kólikterdi paıdalaný).
Oıyn-saýyq saıabaǵynda eresekter men balalarǵa arnalǵan attraktsıondar, shaman aýyly, fotosýretke túsý aımaǵy bar.
Sondaı-aq, kishkentaı qonaqtar úshin «Aıaz ata rezıdentsııasy» jumys isteıdi.
Jyl saıyn balalar oıyn-saýyq kesheni bazasynda 50 myńǵa deıin týrıstke qyzmet kórsetiledi.
Halyqaralyq deńgeıdegi jarystar Şýche qalasyndaǵy Olımpıadalyq daıarlaý ortalyǵynyń aýmaǵynda ótkiziledi.
Qysta munda kásibı shańǵyshylar men sportshylar úshin 20-dan astam sport sharalary ótedi.
— Ótken jyldyń qorytyndysy boıynsha Aqmola oblysy Qazaqstandaǵy týrızmdi damytý draıverleriniń bestigine kirdi. Óńirde týrızmdi damytý geografııasy keńeıýde. Býrabaı bas kýrortynan basqa, Zerendi jáne elordalyq týrızmdi damytý aımaqtary damýda, — deıdi Aqmola oblysy týrızm basqarmasynyń bólim basshysy Ernazar Quttyǵojın.
Astana qalasynyń qala mańyndaǵy aımaǵynda qysqy týrızm qyzmetterin usynatyn birqatar abattandyrylǵan demalys aımaqtary bar, onyń ishinde Arshaly aýdanynda «Beıbarys» demalys bazasy, Aqkól aýdanynda «ARKA TOUR» JShS shańǵy bazasy, «Shar Zhum» demalys ortalyqtaryna kelýshiler sany jyldan jylǵa artyp keledi.
Qala mańyndaǵy demalysty odan ári damytý úshin Tselınograd aýdanynda «Taý parki» demalys aımaǵynyń qurylysy jobasy (syrǵanaqtar, muz aıdyny, shańǵy, qarda júretin kólikter, atpen júrý) júzege asyp jatyr.
Sandyqtaý aýdanynda shańǵy-roller bazasynda jyl saıyn shańǵy sporty ardagerleriniń dástúrli shańǵy marafony ótkiziledi.
Oblysta «Four Seasons» kúntizbelik is-sharalar josparyna sáıkes turaqty negizde qys mezgili men maýsymaralyq kezeńde kýrorttyq aımaqtyń júktelýin qamtamasyz etýge múmkindik beretin birqatar is-sharalar uıymdastyrylady.
Keshe, 17 jeltoqsanda Býrabaı kýrortynda qysqy maýsym ashyldy.
Aıta ketsek, budan buryn Býrabaıǵa bir jylda 1 mln sheteldik týrıst keletinin jazǵan edik.
