Qysqy sport: Úkimet basshysy mınıstrlerge birqatar tapsyrma berdi
ASTANA. KAZINFORM – 2026-shy jylǵy qysqy Olımpıada oıyndaryna sapaly daıyndyq jumystaryn kúsheıtý kerek. Bul týraly Úkimet otyrysynda Premer-mınıstr Oljas Bektenov málim etti.
- Bizdiń ulttyq qurama aldaǵy Azııa oıyndarynda jaqsy nátıje kórsetip, qazaqstandyqtarǵa naǵyz sport merekesin syılaıdy degen úmittemiz. Áıgili sportshylar – olımpıada jeńimpazdary Vladımır Smırnovtyń, Lıýdmıla Prokashevanyń, Elena Hrýstalevanyń, Denıs Tenniń, ıÝlııa Galyshevanyń attary qazaq sportynyń tarıhynda altyn áriptermen jazylǵan.
Sportshylarymyzdyń osy dańqty joldy Harbınde ótetin aldaǵy oıyndarda jalǵastyryp, joǵary nátıje kórsetýlerine tilektespin! Týrızm jáne sport mınıstrligine, ákimdikterge, barlyq múddeli uıymdar men kompanııalarǵa Qytaıda sátti nátıje kórsetý úshin sportshylarymyzǵa barlyq jaǵdaıdy jasaýdy tapsyramyn, - dedi O. Bektenov.
Úkimet basshysy Syrtqy ister mınıstrligi ulttyq quramaǵa dıplomatııalyq jeli boıynsha tıisti qoldaý kórsetýi qajet ekenin aıtty.
- Mádenıet jáne aqparat mınıstrligi sportshylarymyz qatysatyn Azııa oıyndarynyń úzdiksiz ári sapaly translıatsııasyn qamtamasyz etsin. Barlyq sporttyq is-sharalar buqaralyq aqparat quraldary men áleýmettik jelilerde keńinen jarııalanyp otyrýǵa tıis. Sondaı-aq Týrızm jáne sport mınıstrligi ákimdiktermen, Ulttyq Olımpıada komıtetimen, federatsııalarmen birlesip, 2026-shy jylǵy qysqy Olımpıada oıyndaryna sapaly daıyndyq jumystaryn barynsha kúsheıtsin, - dedi Premer-mınıstr.
Buǵan deıin Oljas Bektenov sportshylardy balalar sektsııalarynan bastap olımpıadalyq qurama komandalarǵa deıin tárbıeleýdiń naqty júıe joq ekenin aıtyp, synǵa aldy.