Qysqy shına tańdaýda osy 5 nárseni eskerińiz
ASTANA. KAZINFORM — Qysqy shınany durys tańdamasańyz, joldaǵy qaýip artýy múmkin, dep eskertedi «QazAvtoJol» UK baspasóz qyzmeti.
Qys túskende júrgizýshiler kóliktiń qysqy shınalaryn ýaqytynda aýystyryp, olardy durys tańdaýǵa mán berýi kerek. Bul jol qaýipsizdigi úshin mańyzdy.
Qysqy shınalardyń negizgi túrleri qandaı
Avtokólikterge arnalǵan qysqy shınalar úsh negizgi túrge bólinedi.
Birinshisi — shegeli shınalar. Shegeli shınalar muzdy jáne kóktaıǵaq jolda jolmen jaqsy ilinisedi. Mundaı shınalar aýa temperatýrasy jıi tómendep, muz qatatyn aımaqtarǵa qolaıly.
Ekinshisi — frıktsııalyq (jabyspaly) shınalar. Bul túri qala jaǵdaıynda jáne jumsaq klımatta tıimdi. Frıktsııalyq shınalar qarly jol men dymqyl asfaltta tıimdi, biraq muz ústinde shegeli shınalarǵa qaraǵanda ilinisýi tómen bolýy múmkin.
Úshinshisi — jyl boıǵy shınalar. Jyl boıǵy shınalardyń qysqy jaǵdaıda tıimdiligi klımatqa jáne shınanyń naqty sıpattamalaryna baılanysty. Sondyqtan olardy barlyq qys jaǵdaıyna birdeı jaramdy dep kórsetýge bolmaıdy.
Qysqy shınany tańdaǵanda nege mán berý kerek
Mamandardyń aıtýynsha, qysqy shınalardy tańdaýda birqatar tehnıkalyq kórsetkishke nazar aýdarý qajet.
Jyldamdyq jáne júkteme ındeksi. Tańdalǵan shınalar kóliktiń tehnıkalyq sıpattamalaryna sáıkes bolýy tıis. Bul kórsetkish shınanyń ruqsat etilgen eń joǵary jyldamdyǵy men kótere alatyn salmaǵyn aıqyndaıdy.
Protektor tereńdigi. Qysqy shınalardyń protektorynyń tereńdigi keminde 4 mıllımetr bolýy kerek. Bul kórsetkish jolmen ilinisý sapasyna jáne kóliktiń turaqtylyǵyna tikeleı áser etedi.
Qoldaný merzimi. Tájirıbe boıynsha bes jyldan asqan shınalardy paıdalaný usynylmaıdy, sebebi ýaqyt óte kele olar óziniń serpimdilik qasıetin joǵaltady.
Qysqy shınaǵa qatysty qandaı talaptar bar?
Keden odaǵynyń «Dóńgelekti kólik quraldarynyń qaýipsizdigi týraly» tehnıkalyq reglamentine (TR TS 018/2011) sáıkes, 1 jeltoqsan men 28 (29) aqpan aralyǵynda barlyq M1, N1, N2 jáne N3 sanatyndaǵy kólikter (jeńil avtomobılder, júk kólikteri jáne avtobýstar) qysqy shınalarmen jabdyqtalýy tıis. Qysqy shınalarda mindetti túrde M+S nemese taý beınesindegi qar ulpasy belgisi (3PMSF) bolýy qajet. Atalǵan talaptardy buzǵan jaǵdaıda júrgizýshiler Qazaqstan Respýblıkasynyń qoldanystaǵy zańnamasyna sáıkes ákimshilik jaýapkershilikke tartylady.
Qysqy shınany qalaı kútip ustaý kerek?
Sarapshylar qysqy kezeńde shınalardy udaıy tekserip otyrýdyń mańyzdylyǵyn atap ótedi. Sýyq aýa raıynda shınalardaǵy qysym tómendeıdi, bul kólik basqarylýyna jáne otyn shyǵynyna áser etedi. Shınalardyń jaryq, tilim jáne tozý belgilerin der kezinde anyqtap, aýystyrý qajet. Dóńgelekterdiń teńgerimi (balansırovkasy) buzylǵan jaǵdaıda shınalardyń merziminen buryn tozýy jáne kóliktiń turaqtylyǵynyń tómendeýi múmkin.
— Qysqy shınalardy ýaqtyly ornatyp, olardy durys paıdalaný árbir júrgizýshiniń qaýipsizdiginiń kepili. Kólikti qysqy maýsymǵa aldyn ala daıyndaý arqyly júrgizýshiler óz ómirin jáne ózgelerdiń qaýipsizdigin saqtaıdy, — delingen habarlamada.
Buǵan deıin Shymkentte tozǵan shınalardy qaıta óńdeý qýaty jylyna 10 myń tonnaǵa deıin artqanyn jazǵanbyz.
