Qysqy Paralımpıada júldegerlerine qansha syıaqy tólengeni belgili boldy
ASTANA. KAZINFORM — Qysqy Paralımpıada júldegerleri men olardyń jattyqtyrýshylaryna 388 mıllıon teńgeden astam syıaqy tólendi, dep habarlaıdy Týrızm jáne sport mınıstrliginiń baspasóz qyzmeti.
Qazaqstan Respýblıkasy Úkimeti 2026 jyly Italııanyń Mılan jáne Kortına-d’Ampetstso qalalarynda ótken XIV qysqy Paralımpııa oıyndarynyń jeńimpazy men júldegerlerine jáne úzdik altylyqqa engen sportshylarǵa aqshalaı syıaqy berý týraly qaýly qabyldady.
— Syıaqy Erbol Hamıtov (para bıatlon, para shańǵy jarysy jáne para shańǵy estafetasy), Aleksandr Gerlıts (para shańǵy jarysy jáne para shańǵy estafetasy) jáne Vladıslav Kobalǵa (para shańǵy estafetasy), sondaı-aq sportshylardyń alǵashqy, jeke jáne bas jattyqtyrýshylaryna da tólendi, — delingen mınıstrlik taratqan resmı aqparatta.
Budan bólek, Paralımpıada chempıonyna jergilikti atqarýshy organ tarapynan qosymsha qoldaý kórsetiledi. Atap aıtqanda, ákimdik sportshyǵa jergilikti kommýnaldyq turǵyn úı qorynan tegin páter beredi.
Osyǵan deıin Qysqy Olımpıada jáne Paralımpıadada úzdik ondyqqa engen sportshylar marapattalǵanyn jazǵanbyz.
