Qysqy Paralımpıada alaýy Veronada tutanady
ASTANA. KAZINFORM — Paralımpıadalyq sporttaǵy eń iri oqıǵaǵa bir aı ǵana qaldy. Ulybrıtanııanyń Stok-Mandevıll qalasynda – paralımpıadalyq qozǵalystyń rýhanı besigi sanalatyn mekende – ótetin saltanatty rásim 2026 jylǵy Mılan jáne Kortına-d’Ampetstso qysqy Paralımpıadasynyń alaý saparyna resmı túrde bastaý alady, dep jazdy Kazinform agenttiginiń menshikti tilshisi.
Paralımpıada alaýyn jaǵý rásimi 24 aqpanda ótip, shamamen 400 qonaqtyń basyn qosady. Osylaısha Italııa aýmaǵy boıynsha 2000 shaqyrymǵa sozylatyn alaý estafetasy bastalady. Onyń sharyqtaý shegi 2026 jylǵy 6 naýryzda Verona arenasynda ótetin ashylý saltanaty bolmaq.
Qazirgi tańda ıÝNESKO-nyń Búkilálemdik mura nysany mártebesine ıe tarıhı rım amfıteatry is-sharaǵa daıyndyq aıasynda jańǵyrtyldy. Arnaıy pandýstar ornatylyp, sanıtarlyq toraptar jóndeldi, sportshylardyń qozǵalysy men kútýine arnalǵan aımaqtar jasaqtaldy, sondaı-aq múmkindigi shekteýli kórermenderge arnalǵan oryndar qaıta uıymdastyryldy.
Paralımpıada alaýyn jaǵý qurmeti Ulybrıtanııa atynan úsh márte Paralımpıada oıyndaryna qatysyp, taý shańǵysy sportynan tórt dúrkin júldeger atanǵan Mıllı Naıtqa, sondaı-aq Italııanyń paralımpıadalyq hokkeı quramasynyń kapıtany, aldaǵy besinshi Paralımpıadasyna daıyndalyp jatqan Andrea Makrıge beriledi.
Paralımpıadalyq qozǵalystyń qalyptasýyndaǵy Stok-Mandevılldiń róline arnalǵan is-sharaǵa Halyqaralyq paralımpıada komıtetiniń prezıdenti Endrıý Parsons, ParalympicsGB uıymynyń tóraǵasy Den Brýk jáne WheelPower atynan Bakıngemshır graftyǵyndaǵy Uly mártebeliniń lord-leıtenanty grafınıa Elızabet Hoý qatysady.
Alaýdy jaǵý rásiminen keıin ITA Airways áýe kompanııasynyń arnaıy reısi paralımpıadalyq otty Mılanǵa jetkizedi. Odan ári ol Týrın qalasyna jetkizilip, 2006 jylǵy Týrındegi qysqy Paralımpıada oıyndarynyń 20 jyldyǵyna arnalǵan alǵashqy Alaý festıvaliniń basty nyshanyna aınalady.
Alaý festıvalderi Mılanda (25 aqpan), Boltsanoda (27 aqpan), Trentoda (28 aqpan) jáne Trıeste (2 naýryz) ótedi. Árbir kezeń paralımpıadalyq qaýymdastyq pen onyń qundylyqtaryn nasıhattaýǵa jáne jurtshylyqty tartýǵa múmkindik beredi.
4 naýryzda estafeta alaýdy Venetsııaǵa jetkizedi. Munda qala turǵyndary, mektepter men qaýymdastyqtardyń qatysýymen alǵashqy saltanatty shara ótedi. Kelesi kúni estafeta Padýıaǵa baǵyt alyp, merekelik sharalar Veneto óńirine taraıdy. 6 naýryzda paralımpıadalyq alaý saparyn Verona arenasynda aıaqtaıdy. Aıta keteıik, Paralımpıada oıyndarynyń ashylý saltanaty alǵash ret ıÝNESKO-nyń Búkilálemdik mura nysanynda ótpek.
2026 jylǵy Mılan jáne Kortına-d’Ampetstso qysqy Paralımpıada oıyndary 6–15 naýryz aralyǵynda ótedi. Jarystarǵa shamamen 50 elden 665-ke deıin sportshy qatysyp, alty sport túri boıynsha 79 medal jıyntyǵyn sarapqa salady. Qazaqstan atynan eki sport túri boıynsha jeti sportshy baq synaıdy.
XIV qysqy Paralımpııa oıyndaryna qatysatyn ulttyq qurama tizimimen myna siltemeden tanysa alasyz.