Qysqy oıyn-saýyq: Qaraǵandydaǵy demalys oryndaryna sholý
QARAǴANDY. KAZINFORM - Qysqy kanıkýldy qala sheginen shyqpaı-aq qyzyqty ótkizýge bolady. Qaraǵandyda turǵyndar men qala qonaqtary úshin qysqy demalysqa arnalǵan tegin alańdar barlyq aýdandarda jumys istep tur.
Bıylǵy qys maýsymynda Qaraǵandyda ashyq aspan astyndaǵy barlyq 5 tegin muz aıdyny tolyqqandy jumys istep tur. Muz alańdary qalanyń ár aýdanynda ornalasqan jáne qysqy demalys kezeńinde eń kóp baratyn qoǵamdyq demalys oryndarynyń biri sanalady.
Turǵyndar óz konkıimen Saryarqa kóshesindegi «Alash» gúlzarynda, Maıqudyqtaǵy Qazaqstannyń 50 jyldyǵy saıabaǵynda, Prıshahtınsk aýdanyndaǵy Qazaqstannyń 40 jyldyǵy saıabaǵynda, sondaı-aq Suryptaýda temirjolshylar mádenıet úıiniń janyndaǵy saıabaqta tegin syrǵanaı alady.
Muz aıdyndary kún saıyn saǵat 12:00-den 23:00-ge deıin ashyq. Alaıda jumys ýaqyty aýa raıy jaǵdaıyna baılanysty ýaqytsha ózgerýi múmkin.
Qaraǵandy qalasynyń saıabaqtar men skverler basqarmasynyń málimetinshe, aýa temperatýrasy nólden joǵary kóterilgen kezde muz aıdyndarynyń jumysy ýaqytsha toqtatylady. Temperatýra qaıtadan qajetti deńgeıge túsken soń, mamandar muz jamylǵysyn tegistep, alańdardy qaıta iske qosady. Jumys rejımine qatysty ózekti aqparat saıabaqtardyń Instagram paraqshalarynda jarııalanady.
Óz konkıi joq kelýshiler úshin jalǵa berý qyzmeti qarastyrylǵan. Konkıdi jalǵa alý quny — 1000 teńge. Muz aıdyndaryna kireberiste eki tilde qaýipsizdik erejeleri ornalastyrylǵan: muzǵa tek konkımen shyǵýǵa ruqsat etiledi, konkısiz júrýge, sondaı-aq tamaq pen sýsyn alyp kirýge tyıym salynady. Balalar eresekterdiń baqylaýymen syrǵanaǵany jón.
Muz aıdyndarynan bólek, qalada tıýbıngpen syrǵanaýǵa arnalǵan muz tóbeshikter de jabdyqtalǵan. Óz tıýbıngi bar azamattar olardy tegin paıdalana alady. Sonymen qatar jalǵa berý qyzmeti de bar — baǵasy tóbeshik ornyna baılanysty saǵatyna 3 myńnan 7 myń teńgege deıin ózgeredi.
Qalanyń eń iri muz tóbeshigi QarÝ mańynda ornalasqan. Bul oryn dástúrli túrde qala turǵyndary men qonaqtary arasynda suranysqa ıe. Munda kóbine balalarymen kelgen otbasylar men jastar jınalyp, qysqy demalystyń qoljetimdi ári belsendi túrin tańdaıdy.
Osylaısha, Qaraǵandyda qysqy kanıkýldy mazmundy ári ártúrli formatta ótkizýge múmkindik mol. Muz aıdyndary men muz tóbeshikteri qalanyń barlyq derlik aýdandarynda ornalasqan jáne barlyq nıet bildirýshiler úshin qoljetimdi.
Aıta keteıik, buǵan deıin aýa raıynyń jylynýyna baılanysty Astanadaǵy Esil jaǵalaýynda ornalasqan muz aıdyny men muz tóbeshikteriniń jumysy ýaqytsha toqtatylǵany habarlanǵan bolatyn.
