Qysqy Olımpııa oıyndarynda Tý ustap shyqqan otandyq sportshylar
ASTANA.KAZINFORM - Kelesi jyly Italııanyń Mılan jáne Kortına-d’Ampetstso qalalarynda XXV qysqy Olımpııa oıyndary ótedi. Tórt jyldyń basty dodasy 2026 jyldyń 6-22 aqpan kúnderine josparlanǵan. Aq qar men kók muz ústindegi baıraqty básekege Qazaqstan quramasynyń sportshylary da qatysady.
Týrızm jáne sport mınıstrligi Qazaqstan táýelsiz el retinde qatysqan qysqy Olımpıadalarda elimizdiń kók Týyn ustap shyqqan sportshylar týraly aqparat usyndy. Tórt jyldyqtyń basty dodasyna qatysý kez kelgen sportshynyń armany bolsa, bul dodada tý ustap shyǵý – ár sportshyǵa buıyra bermeıtin ataq jáne úlken jaýapkershilik.
1994 jyly Norvegııanyń Lıllehammer qalasynda ótken qysqy Olımpıadada Qazaqstannyń Týyn tramplınnen sekirýshi, elimizdiń tórt dúrkin chempıony, TMD elderi kýboginiń ıegeri Qaırat Bıekenov ustap shyqty. Olımpıadada ol 90 metrlik tramplınnen sekirýde 48-orynnan (157,5 upaı), al 120 metrlik tramplınnen sekirýde 58-orynnan kórindi (35,2 upaı).
1998 jyly Japonııanyń Nagano qalasyndaǵy qysqy Olımpıadada Kók týdy ustaý mártebesi Lıllehammerde Qazaqstan qorjynyna úsh júlde salǵan shańǵyshy Vladımır Smırnovqa buıyrdy. Vladımır Smırnov Naganoda da júldegerler qatarynan kórinip, Olımpıadanyń qola júldesin ıelendi.
2002 jyly AQSh-tyń Solt-Leık-Sıtı qalasynda uıymdastyrylǵan XIX qysqy Olımpııa oıyndarynda Qazaqstan baıraǵyn konkımen júgirý ókili Radık Bıkchentaev ustap shyqty. Radık Bıkchentaev sol kezdegi quramadaǵy eki Olımpıadaǵa qatysqan (1994, 1998) tájirıbeli sportshylardyń biri edi. 1 500 jáne 5 000 metrge jarysta otandasymyz 19-orynnan kórindi.
2006 jyly Italııanyń Týrın qalasyndaǵy Olımpıadada elimizdiń kók Týyn hokkeıshi Aleksandr Koreshkov ustady. Týrındegi shaıbaly hokkeı básekesinde Qazaqstan quramasy irikteý kezeńinde «V» tobynda synǵa túsip, alty quramanyń ishinde eki upaımen besinshi oryn aldy. Al Olımpıadany 9-orynmen qorytyndylady.
2010 jyly Kanadanyń Vankýver qalasynda ótken qysqy Olımpıadada Qazaqstannyń Týyn bıatlonshy Dıas Keneshev alyp shyqty. Estafeta saıysynda quramynda Dıas Keneshev bar Qazaqstan komandasy márege 18-shi bolyp jetti.
2014 jyly Sochı Olımpıadasynda Týdy shańǵyshy Erdos Ahmadıev ustap shyqty. Tý ustaǵan sportshymyz 50 shaqyrymdyq qashyqtyqta synǵa túsip, márege 48-shi bolyp keldi.
2018 jylǵy Phenchhan Olımpıadasynda Qazaqstannyń kók Týy short-trekshi Abzal Ájiǵalıevke tabystaldy. Ájiǵalıev Ońtústik Koreıadaǵy oıyndarda 500 metrge jarysta márege 9-shy bolyp jetti.
2022 jyly Beıjińdegi qysqy Olımpıadada Qazaqstannyń baıraǵyn short-trekten álem kýbogi kezeńderiniń jeńimpazy ári júldegeri Abzal Ájiǵalıev jáne konkımen júgirýden tórt qurlyq chempıony Ekaterına Aıdova ustady. Qytaıdaǵy dodada Abzal 500 metrge jarysta 4-oryn alǵan edi. Al Ekaterına Aıdova 1 500 metr jarysta 18-orynnan kórindi.
Aıta keteıik, Olımpııa oıyndary 2026 jyly Italııada ótedi.