Qysqy Olımpıadanyń ashylý saltanatynda Qazaqstan týyn kim ustaıdy

ASTANA. KAZINFORM — Týrızm jáne sport mınıstri Erbol Myrzabosynov 6-22 aqpan aralyǵynda Italııanyń Mılan men Kortına-d’Ampetstso qalalarynda ótetin XXV qysqy Olımpıada oıyndarynyń ashylý saltanatynda elimizdiń kók baıraǵyn ustap shyǵatyn sportshylarǵa qatysty pikir bildirdi.

— Óz elińniń týyn ustap shyǵý mańyzdy. Búginde lıtsenzııalyq jarystar aıaqtalǵan joq. Qańtar aıynyń sońynda lıtsenzııalar tolyq aıaqtalǵannan keıin bárimiz qaıta jınalyp, qoǵammen qaı sportshy tý ustap shyǵatynyn anyqtaımyz, — dedi mınıstr Úkimet otyrysynan keıin BAQ ókilderiniń saýalyna oraı.

Osy rette mınıstr qysqy Olımpıadanyń ashylý saltanatynda Qazaqstan týyn Denıs Nıkısha men ıAna Han ustap shyǵady degen aqparatqa qatysty túsinikteme berdi.

— Shyndyqqa janaspaıdy. Biz lıtsenzııalardy tolyq alyp bolmaıynsha ondaı boljam jasamaımyz, ári tý ustaıtyn sportshylardy qoǵammen aqyldasa otyryp, Prezıdent Ákimshiligine usynamyz. Munan bólek, Olımpıada baǵdarlamasynda ashylý saltanatynan keıin erteńinde sportshylar márege shyǵatyn sport túrleri bar. Oǵan da qaraımyz. Eger sportshylarymyz erteńinde jarys alańyna shyqsa, onda tý ustaýǵa jibermeımiz. Sondyqtan lıtsenzııaǵa, Olımpıada baǵdarlamasyna qarap, qoǵammen kelisip usynamyz, — dedi Erbol Myrzabosynov.

Buǵan deıin 2026 jyly Italııada ótetin qysqy Olımpıada oıyndaryna sapaly daıyndyq úshin 13,3 mlrd teńge bólingenin jazǵan edik.