Qysqy Olımpıadaǵa Qazaqstannan neshe sportshy qatysady

ASTANA. KAZINFORM — Týrızm jáne sport mınıstri Erbol Myrzabosynov Úkimette 2026 jyly Italııada ótetin qysqy Olımpıada oıyndaryna sportshylarymyzdyń daıyndyǵy jóninde baıandady.

XXV Qysqy Olımpıada oıyndary 6-22 aqpan aralyǵynda Italııanyń Mılan jáne Kortına-D'Ampetstso qalalarynda ótedi. Jarysqa 93 elden 3 myńǵa jýyq sportshy qatysady dep kútilýde. Barlyǵy 116 marapat jıyntyǵy oınatylady.

— Ulttyq komanda sporttyń 10 túrinen 58 medal jıyntyǵy boıynsha baq synasady. Olardyń qatarynda bıatlon, konkımen júgirý, mánerlep syrǵanaý, short-trek, taý shańǵy sporty, shańǵy qossaıysy, shańǵy jarystary, shańǵymen tramplınnen sekirý, frıstaıl-mogýl jáne frıstaıl-akrobatıka bar, — dedi E. Myrzabosynov Úkimettiń búgingi otyrysynda. 

Saltanatty ashylý rásimi 2026 jyldyń 6 aqpanynda Mılan qalasynda ótedi, al jabylý saltanatyn 22 aqpanda Verona qalasynda uıymdastyrý josparlanǵan. 

Oıyndar baǵdarlamasy konkımen júgirý jáne shańǵy jarysy sportshylarynyń óner kórsetýimen bastalady. Sońǵy kezeńde taý shańǵysy boıynsha jarystar ótedi. 

— Boljamǵa sáıkes, ulttyq komandanyń quramynda 35-ke jýyq sportshy bolady dep kútilýde. 2022 jyly Beıjińde ótken qysqy Olımpıada oıyndarynda elimizdiń namysyn 34 sportshy qorǵaǵan. Qazir Sofıa Samodelkına men Mıhaıl Shaıdorovtyń mánerlep syrǵanaýdan 2 jeke resmı Olımpıada lıtsenzııalary bar. Sonymen qatar, sportshylarymyz short-trekten 9, konkımen júgirýden 12 lıtsenzııa jeńip aldy, — dedi Týrızm jáne sport mınıstri. 

Buǵan deıin Mılan Olımpıadasyndaǵy Qazaqstan quramasynyń kıim formasy jarııalanǵan edi.