Qysqy Olımpıadaǵa qaı elder alǵash ret qatysady

ASTANA. KAZINFORM - Búgin Italııanyń Mılan jáne Kortına-d’Ampetstso qalalarynda bastalatyn XXV qysqy Olımpıada oıyndaryna úsh memleket alǵash ret qatysady.

2026 jylǵy 6-22 aqpan aralyǵynda ótetin dúbirli dodada álemniń 90-nan astam elinen shamamen 2 900-3 500 sportshy qatysady dep kútiledi. Baıraqty básekede 16 sport túri boıynsha 116 medal jıyntyǵy sarapqa salynady.

Bedeldi básekege Birikken Arab Ámirligi, Benın jáne Gvıneıa-Bısaý óz úzdikterin úkilep qosady.

BAÁ-nen taý shańǵysy sportynan erler jáne áıelder arasynda eki sportshy jarys jolyna shyqsa, Benın men Gvıneıa-Bısaý da atalǵan sport túrinen qatysady.

Al aq Olımpıadada eń kóp sportshy qosatyn elder bar. Atap aıtqanda, AQSh - 233, Kanada - 210, Italııa - 196, Germanııa - 189, Shveıtsarııa - 175 úzdigine senim artady.

Dúbirli dodada elimizdiń ulttyq quramasy sporttyń 10 túrinen 58 medal jıyntyǵy boıynsha baq synaıdy. Olardyń qatarynda bıatlon, konkımen júgirý, mánerlep syrǵanaý, short-trek, taý shańǵy sporty, shańǵy qossaıysy, shańǵy jarystary, shańǵymen tramplınnen sekirý, frıstaıl-mogýl jáne frıstaıl-akrobatıka bar.

Baıraqty básekege Qazaqstan quramasynan 36 sportshy qatysady.

Sondaı-aq Qazaqstan quramasynyń ortasha jasy – 25 jas. Eń jas sportshy – frıstaıl-akrobatıkadan synǵa túsetin 16 jastaǵy Asan Asylhan. Al eń tájirıbeli sportshy – short-trekshi 33 jastaǵy Abzal Ájǵalıev. Quramadaǵy eń ataqty sportshy – frıstaıl-mogýldan baq synaıtyn ıÝlııa Galysheva.

Qazaqstandyq kórermender búgin XXV qysqy Olımpıada oıyndarynyń saltanatty ashylý rásimin Astana ýaqyty boıynsha saǵat 23:50-den bastap Jibek Joly telearnasynyń tikeleı efırinen tamashalaı alady.