Qysqy Olımpıadaǵa daıyndyqqa 13,3 mlrd teńge bólindi — mınıstrlik

ASTANA. KAZINFORM — 2026 jyly Italııada ótetin qysqy Olımpıada oıyndaryna sapaly daıyndyq úshin 13,3 mlrd teńge bólindi. Oǵan qosa, TOP-deńgeıdegi 13 sheteldik jattyqtyrýshy-keńesshi jumyldyryldy. Bul týraly Týrızm jáne sport mınıstri Erbol Myrzabosynov Úkimette baıandady.

Elimizde qysqy olımpıadalyq sporttyń 13 túri damyp keledi. Olımpıadalyq rezervti daıyndaý maqsatynda sporttyq ınfraqurylymdy keńeıtý jumystary júrip jatyr. Búginde elimizde qysqy sport túrlerine arnalǵan 1262 sport nysany bar. Bul ınfraqurylym qysqy sport túrleriniń qoljetimdiligin qamtamasyz etedi.

— Qysqy sport túrlerimen júıeli túrde aınalysatyn azamattardyń sany 149 myńǵa jýyq adamdy qurasa, sport mektepterimen qamtylǵan balalar men jasóspirimder sany 17 myńǵa jetti. Bul rette ulttyq komandany qalyptastyrý halyqaralyq jarystardaǵy nátıjeler boıynsha júzege asyrylady. Mınıstrlik respýblıkalyq federatsııalardyń jáne óńirlerdiń ákimdikterimen birlesip, áleýeti bar sportshylardy iriktedi, — dedi E. Myrzabosynov Úkimettiń búgingi otyrysynda.

Tizimge halyqaralyq arenada joǵary nátıje kórsetip, álem chempıonattary men kýboktarynda túrli deńgeıdegi medaldardy jeńip alǵan sportshylar endi. 

— Olardyń ishinde frıstaıl-mogýldan jasóspirimder arasynda 2025 jylǵy álem chempıony, eresekter arasyndaǵy álem chempıonatynyń qola júldegeri Anastasııa Gorodko bar. Mánerlep syrǵanaýdan 2025 jyly Mıhaıl Shaıdorov álem chempıonatynyń kúmis júldegeri atansa, áıelder arasyndaǵy Gran-prıde Sofıa Samodelkına alǵashqy tarıhı kúmisti jeńip aldy, — dep tolyqtyrdy mınıstr.

Short-trekten Denıs Nıkısha 2024 jyly álem chempıonatynda tarıhı kúmis medal jeńip alyp, bul jetistigin 2025 jyly da qaıtalady. Konkımen júgirýden Evgenıı Koshkın 2025 jylǵy Álem kýbogynyń kezeńderinde eki altyn medal jeńip aldy. 2025 jylǵy Azııa oıyndarynda Sherzod Hashırbaev pen Roman Ivanov frıstaıl-akrobatıkadan Qytaıdyń eki favorıt komandasyn jeńip, altyn medalǵa qol jetkizdi.

Nátıjelerdi qamtamasyz etý úshin mınıstrlik sport federatsııalarymen birlesip, ulttyq komandany daıyndaýdyń keshendi josparyn jasady. Onyń aıasynda oqý-jattyǵý jıyndary, medıtsınalyq-psıhologııalyq qoldaý, qarjylyq qoldaý, qajetti sporttyq qural-jabdyqtar, tamaqtaný jáne bilikti jattyqtyrýshylarmen jumys isteý qarastyrylǵan. 

— Oıyndarǵa sapaly daıyndyq maqsatynda ulttyq komandalar 178 oqý-jattyǵý jıynyn ótkizdi, sportshylarymyz 125 halyqaralyq jarystarǵa qatysty.  Qarjylandyrýdyń jalpy somasy 13,3 mlrd teńgeni qurady. Onyń ishinde federatsııalar qarajatynan – 585 mıllıon teńge, respýblıkalyq bıýdjetten – 5,3 mıllıard teńge, jergilikti bıýdjetten – 6,2 mıllıard teńge, Týrızm jáne sport ındýstrııasyn qoldaý qorynan – 1,2 mıllıard teńge bólingen, — dedi Erbol Myrzabosynov. 

Sondaı-aq, qysqy olımpıadalyq sport túrlerinen ulttyq komandalardyń bas bapkerleri anyqtaldy. Germanııa, Nıderlandy, Ispanııa, Slovenııa, Polsha, Reseı jáne Belarýs elderinen mánerlep syrǵanaý, konkımen júgirý, shańǵy jarysy, short-trek jáne bıatlon boıynsha 13 sheteldik TOP-deńgeıdegi jattyqtyrýshy-keńesshi jumyldyryldy.

Aıta keteıik, 2026 jyly Italııada ótetin qysqy Olımpıada oıyndaryna Qazaqstannan 35 sportshy qatysady dep kútilýde.