Qysqy Olımpıadadaǵy qazaq volonteri: sheteldik ozyq tájirıbeni elime aparǵym keledi
LIVINЬO.KAZINFORM — Qazirgi zamanda kez-kelgen is-shara volontersiz ótpeıtini belgili. Ásirese Olımpıada oıyndary sııaqty halqaralyq sporttyq iri sharalarda olardyń oryny erekshe. Italıaıynń Mılan jáne Kortına-d’Ampetstso qalalarynda ótip jataqn XXV qysqy Olımpıada oıyndarynda 18 myń volonter qyzymet kórsetip jatyr. Osy oraıda, Kazinform tilshisi Mılan jáne Lıvıno qalasynda erikti qyzymetin atqaryp júrgen qazaq qyzdaryn kezdestirip, sóılesip qaıtqan edi.
Aıshat jáne Nurshat Iembergenqyzy esimdi otandastarymyz bir otbasynyń egiz qyzdary. Almaty obylysy, Eńbekshiqazaq aýdany Taýqaraturyq aýylynda týyp ósken egizder jastaıynan bilimge qushtar bolyp, Almaty qalasyndaǵy Qazaq ulttyq agrarlyq zertteý ýnıversıtetinde (QazUAZÝ) magıstr dárejesin alǵan.
Alaıda, qyzdar bilim jolyn shetelde jalǵastyrý týraly sheshim qabyldap, tańdaý Italııaǵa túsken.
— Shetelde bilim alyp, ózińdi damytý kerek degen maqsatymyz boldy. Basty armanymyz — sheteldiń ozyq tájirıbesin elimizge ákelý. Sol sebepti, aǵylshyn tilin oqyp, Italııadaǵy University of Eastern Piedmont Amedeo Avogadro ýnıversıtetiniń taǵam, densaýlyq jáne qorshaǵan orta mamandyǵyna oqýǵa tústik, — dedi Aıshat.
Nurshat Olımpıadanyń erikti qyzymetine qalaı kelgenin aıtyp berdi.
— Indııalyq dostarymyz boldy. Eń alǵash volonter bolý týraly solardan estidik. Mılan qalasynda ótken irikteýde barlyq qabiletterimizdi synap kórdi. Qortyndysynda, biz bastapqy irikteýden surinbeı ótip, Olımpıada oıyndarynyń erikti qyzymetine shaqyrtý aldyq. Daıyndyq kýrstarynan sátti ótkennen keıin, men Mılanda uıymdastyrý bóliminde, al Aıshat Lıvıno kýrortynyń transporttyq uıymdastyrý bóliminde jumys atqaryp jatyrmyz, — dedi ol.
Egizder qazaqstandyq sportshylardyń Olımpıadaǵy barlyq jarysyna jankúıer bolyp otyrǵanyn, sonymen qatar 32 jyl kútken altyn medal úshin shyn júrekten qatty qýanǵanyn jasyrmady.
— Shet jerde júrgende otandastarymyz ushyrassa, qatty qýanamyz. Elimizdiń ár sportshysy úshin jankúıer bolyp, jeńiske jetse eken dep tilekshi bolyp otyrmyz. Mıhaıl Shaıdorov altyn medal alǵanda qýanyshtan kózimizge jas keldi. Kóptegen sheteldik volonter áriptesterim quttyqtaý jiberdi, — dedi Aıshat.
Qazaq qyzdary qazirgi ýaqytta osyndaı úlken sporttyq is-sharada júrip kóptegen tájirıbeler jınap jatqanyn basa aıtty. Olar aldaǵy ýaqytta týǵan jeri Almatyda qysqy Azııa oıyndarynyń ótetini týraly jańalyqty maqtanyshpen qabyldaǵanyn, sonymen qatar sol sharada qyzymet atqarǵysy keletinin jetkizdi.
— Almatyda qysqy Azııa oıyndary ótetinine qatty qýanamyn ári maqtan tutamyn. Osyndaı halqaralyq deńgeıdegi sharalar elimizdiń bedelin kóterip, elimizdiń qysqy sporttynyń damýyna aıtarlyqtaı úles qosatynyna senimdimin. Shynymdy aıtsam, týǵan jerimizde qysqy Azııa oıyndaryna qyzymet atqaryp, bir kisilik úlesimizdi qosqymyz keledi, — dedi Nurshat.
Aıta keterligi, osyǵan deıin Olımpıada oıyndary ótip jatqan Lıvıno shańǵy kýrorty jáne Mılan qalasy týraly tanystyryp, fotoreportaj usynǵan edik.