Qysqy Olımpıada jáne Paralımpıadada úzdik ondyqqa engen sportshylar marapattaldy
ASTANA.KAZINFORM — Astanada Týrızm jáne sport mınıstri Erbol Myrzabosynovtyń tóraǵalyǵymen 2022-2026 jyldardaǵy qysqy olımpıadalyq tsıkl qorytyndysyna arnalǵan keńeıtilgen jıyn ótti.
Іs-sharada halyqaralyq arenada joǵary nátıjeler kórsetken sportshylar men olardyń jattyqtyrýshylary marapattaldy.
Jıyn barysynda XXV qysqy Olımpıada jáne XIV qysqy Paralımpıadada úzdik ondyqqa engen sportshylar men olardyń jattyqtyrýshylaryna vedomstvolyq nagradalar tabystaldy.
2022-2026 jyldardaǵy qysqy olımpıadalyq tsıkl Qazaqstan úshin tarıhı kezeń boldy. Italııanyń Mılan jáne Kortına-d’Ampetstso qalalarynda ótken tórtjyldyqtyń basty básekesinde otandyq sportshylar tarıhı nátıjelerge qol jetkizdi.
Qysqy Olımpıada qorytyndysy boıynsha Qazaqstan jalpykomandalyq esepte 19-oryndy ıelendi. Mánerlep syrǵanaýdan Mıhaıl Shaıdorov altyn medal oljalap, el tarıhynda osy sport túrinen Olımpıada chempıony atanǵan alǵashqy sportshy atandy. Osylaısha Qazaqstan keıingi 32 jylda qysqy Olımpıadada alǵashqy altyn medaline ıe boldy.
Paralımpıadada Qazaqstan quramasy 55 eldiń ishinde 18-orynǵa turaqtady. Erbol Hamıtov para bıatlonnan — altyn, para shańǵy jarystarynan qola medal jeńip aldy. Onyń jeńisi Qazaqstan tarıhynda para bıatlonnan alǵashqy altyn jáne bir sportshynyń qysqy Paralımpııa oıyndarynda birden eki medal jeńip alǵan erekshe jetistigi retinde este qaldy.
Sonymen qatar birqatar otandyq sportshylar Olımpıada jáne Paralımpıadada úzdik ondyqqa enip, ulttyq quramanyń daıyndyq deńgeıiniń joǵary ekenin kórsetti.
Týrızm jáne sport mınıstrligi joǵary nátıje kórsetken sport túrlerin damytý, ulttyq quramalardyń básekege qabilettiligin arttyrý jáne sportshylardy aldaǵy halyqaralyq jarystarǵa daıyndaý baǵytyndaǵy keshendi sharalardy jalǵastyra beredi.
Jıynda 2026 jylǵy jasóspirimder arasyndaǵy álem chempıonattarynda joǵary nátıje kórsetken sportshylardyń jetistigi de atap ótildi. Olar otandyq sporttyń rezervi qalyptasqan jáne áleýeti joǵary ekenin kórsetti.
II «Dostyq» ordenimen jasóspirimder arasyndaǵy bes dúrkin álem chempıony Krıstına Shýmekovanyń alǵashqy jattyqtyrýshysy marapattaldy.
Konkımen júgirý sportynan aǵa jattyqtyrýshyǵa sport túrin damytýǵa jáne joǵary deńgeıdegi sportshylardy daıyndaýǵa qosqan úlesi úshin «Qurmet» ordeni berildi.
«Dene shynyqtyrý jáne sportty damytýǵa qosqan úlesi úshin» tósbelgisimen shańǵymen tuǵyrdan sekirýden bas jattyqtyrýshy, frıstaıl-akrobatıkadan bas jattyqtyrýshy, frıstaıl-mogýldan bas jattyqtyrýshy, «Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń» qyzmetkeri, para shańǵy jarystary men para bıatlonnan keńesshi jattyqtyrýshy jáne Ulttyq sporttyq medıtsına jáne ońaltý ortalyǵynyń medbıkesi marapattaldy.
«Qurmetti sport qyzmetkeri» tósbelgisi mánerlep syrǵanaýdan, konkımen júgirýden, shańǵymen tuǵyrdan sekirýden, short-trekten, frıstaıldan, sondaı-aq para bıatlon men para shańǵy jarystarynan Olımpıada jáne Paralımpıadaǵa qatysqan sportshylarǵa berildi.
Týrızm jáne sport mınıstriniń Qurmet gramotasy frıstaıl-akrobatıkadan keńesshi jattyqtyrýshysyna, «Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń» qyzmetkerine, Ulttyq sporttyq medıtsına jáne ońaltý ortalyǵynyń qyzmetkerine jáne joǵary nátıjeleri, sonyń ishinde 2026 jylǵy jasóspirimder arasyndaǵy álem chempıonatynda kórsetken kórsetkishteri úshin ulttyq qurama sportshylaryna tabystaldy.
Aıta ketelik Shymkentte maýntınbaıktan Qazaqstan chempıonaty bastalǵan edi.
