Qysqy Olımpıada-2026: Salynbaǵan nysandar, ekologııaǵa qaýip jáne bıletter baǵasy
ASTANA. KAZINFORM – Aldaǵy Qysqy oıyndar birneshe sebepke baılanysty tarıhta qalady: bul geografııalyq turǵydan eń aýqymdy Olımpıada bolmaq jáne baǵdarlamaǵa alǵash ret skı-alpınızm engizildi. Únemdeý men turaqty damý baǵyty jarııalanǵanyna qaramastan, daıyndyq jumystary qazirdiń ózinde synǵa ushyrady. Ásirese Kortınada trassa salý úshin 500-600 jyldyq aǵashtardyń kesilýi qoǵam narazylyǵyn týdyrdy. Aldaǵy oıyndarǵa daıyndyq barysy týraly Kazinform materıalynan oqı alasyzdar.
Bıylǵy qysqy Olımpıada 6 aqpanda Italııada bastalady. Ashylý saltanaty Mılan qalasyndaǵy áıgili «San-Sıro» fýtbol stadıonynda ótedi. Oıyndar 22 aqpanǵa deıin jalǵasady, al Paralımpıada jarystary 6-15 naýryz aralyǵynda ótedi.
Qysqy Olımpıada-2026 erekshelikteri
Bul tarıhtaǵy alǵashqy resmı eki qalasy bar Qysqy Olımpıada bolmaq: Mılan qalasynda muz aıdyndaryndaǵy jarystar ótse, Kortına-d’Ampetstsoda qar men taý sport túrlerinen saıystar uıymdastyrylady. Oǵan 90-nan astam elden shamamen 2900-3500 sportshy qatysady dep kútiledi. 16 sport túri boıynsha 116 medal jıyntyǵy sarapqa salynady. Bul Beıjiń-2022 olımpıadasymen salystyrǵanda 7 medal jıyntyǵyna kóp.
Bul tarıhtaǵy geografııalyq turǵydan eń keń aýqymdy Qysqy Olımpıada: jarystar Italııanyń úsh óńirinde (Lombardııa, Veneto, Trentıno-Alto-Adıdje) ornalasqan segizden astam klasterde ótedi.
Sondaı-aq, jańa sport túri — skı-alpınızmniń debıýti bolady (ski mountaineering). Olımpıada baǵdarlamasynda alǵash ret kamýspen shańǵymen órleý men jyldam tómen syrǵanaýdy biriktiretin jarys usynylady.
Uıymdastyrýshylar turaqty damý qaǵıdattaryna erekshe mán berip otyr, ıaǵnı qoldanystaǵy arenalardy barynsha paıdalaný jáne jańa qurylys kólemin barynsha azaıtý kózdelgen. Onyń ústine Olımpıada 1956 jylǵy oıyndardan keıin 70 jyldan soń Kortınaǵa qaıta oraldy. Degenmen, bul Olımpıada da osyǵan deıingi aýqymdy sharalar sekildi qymbatqa túsedi. Olımpıada-2026-ǵa salynatyn jalpy ınvestıtsııa shamamen 3,5 mıllıard eýroǵa (4,7 mıllıard AQSh dollary) baǵalanyp otyr. Bul 98 jobany qamtıdy, onyń 47-si qysqy oıyndarmen tikeleı baılanysty. Alaıda Simico ınfraqurylymdyq kompanııasynyń málimetinshe, josparlanǵan árbir tórtinshi joba oıyndar bastalǵansha aıaqtalyp úlgermeıdi.
Mysaly, jańa hokkeı arenasynyń qurylysy 6 aqpanda ótetin ashylý saltanatyna az ýaqyt qalǵanda ǵana aıaqtalady dep kútiledi. Oıyndar bastalar aldynda nysandy tekserý úshin josparlanǵan is-sharany keıinge qaldyrýǵa týra keldi.
Aldaǵy oıyndar Halyqaralyq olımpıada komıtetiniń (HOK) jańa prezıdenti Kırstı Koventrıdiń (Zımbabve) basshylyǵymen ótetin alǵashqy Olımpıada bolmaq.
Kırstı Koventrı 2025 jylǵy 23 maýsymnan bastap Halyqaralyq olımpıada komıtetiniń prezıdenti qyzmetin atqarady. Ol — bul laýazymdaǵy alǵashqy áıel, sondaı-aq Afrıka qurlyǵynan shyqqan alǵashqy ókil jáne Per de Kýberten zamanynan bergi HOK-tyń eń jas prezıdenti sanalady.
Olımpıada oıyndary tarıhynda alǵash ret eki Olımpıada alaýy jaǵylady:
Biri Mılan qalasynda, qalanyń sımvolyna aınalǵan Beıbitshilik arkasynyń (Arco della Pace) janynda jaǵylady.
Ekinshisi Kortına-d’Ampetstso qalasynyń ortalyǵyndaǵy Dıbona alańynda ornatylady.
Olımpıada boıtumarlary
Mılan men Kortınada ótetin 2026 jylǵy Qysqy Olımpıadanyń boıtumarlary — «Tina» jáne «Milo» esimdi keıipkerler (aqkister).
Olar — Italııa Alpileri men Dolomıt taýlaryn bildiretin eki súıkimdi aqkis baýyrlar. Bul keıipkerlerdi 2023-2024 jyldary ótken baıqaýda Kalabrııa óńiriniń mektep oqýshylary oılap tapqan, sondyqtan boıtumarlar halyq arasynda keń tanyldy.
Tina — aq tústi aqkis (Olımpıada oıyndaryna arnalǵan). Ol qysty, Dolomıt pen Kortına-d’Ampetstso qarlarynyń tazalyǵyn bildiredi. Ol óte jigerli, batyl, taýdaǵy shytyrman oqıǵalardy jaqsy kóredi.
Milo — qońyr tústi aqkis (Paralımpıada oıyndaryna arnalǵan). Onyń bir aıaǵy joq — bul qıyndyqtardy eńserýdiń jáne ınklıýzıvti qoǵamnyń sımvoly. Milo sán men ınnovatsııa qalasy sanalatyn Mılandy beıneleıdi.
Ashylý saltanaty qalaı ótedi
2026 jyly Mılan men Kortınada ótetin Qysqy Olımpıada oıyndarynyń ashylý saltanatynda kóptegen sportshylar óz eliniń týyn alyp shyǵady. Qabyldaýshy el Italııa tórt tý ustaýshyny usynady, al sportshylar sherýi tórt jerde ótedi. Negizgi saltanatty kesh Mılan qalasyndaǵy «San-Sıro» olımpıadalyq stadıonynda uıymdastyrylady. Sol ýaqytta Predatstso, Lıvıno jáne Kortına-d’Ampetstsoda marapattaý rásimderi men sportshylar sherýi qatar ótedi.
Mılan-Kortına-2026 Olımpıada oıyndarynyń naqty bekitilgen tý ustaýshylarynyń tizimimen osy jerde tanysýǵa bolady.
Belgili ıtalııalyq ánshi Andrea Bochellı 2026 jylǵy Olımpıada oıyndarynyń ashylý saltanatynda óner kórsetetini belgili boldy. Ol Meraııa Kerı men Laýra Paýzını sekildi álemdik juldyzdardyń qataryna qosylady. «Time to say goodbye», «The prayer» jáne «Because we believe» sııaqty áserli týyndylarymen tanylǵan álemge áıgili tenor Garmonııa taqyrybyna arnalǵan saltanatty keshtiń basty juldyzy bolmaq.
Andrea Bochellıdiń Mılan men Kortınada ótetin Olımpıadadaǵy óner kórsetýi aıryqsha kútilip otyr. Bul – onyń 2006 jyly Týrınde ótken Qysqy Olımpıada oıyndarynyń jabylý saltanatynda «Because we believe» áninen keıingi Olımpıada sahnasyna ekinshi ret shyǵýy. Sol kezdegi óneri onyń iri sporttyq sharadaǵy alǵashqy ári este qalǵan perfomanstarynyń biri retinde tarıhta qaldy.
Mılan-Kortına–2026 qysqy Olımpıada oıyndarynyń ashylý saltanatyn «Balich Wonder Studio» stýdııasy uıymdastyrady. Uıymdastyrýshylar bul jahandyq merekege jańa, ınklıýzıvti sıpat berýdi ýáde etip otyr.
Qaýipsizdik sharalary
Olımpıada sportshylary men qonaqtarynyń qaýipsizdigi uıymdastyrýshylar úshin mańyzdy basymdyq bolyp qala beredi. Sondyqtan eki myń polıtsııa qyzmetkeri, onyń ishinde ıtalıandyq karabınerler men qarjy gvardııasy shaqyryldy, olar Mılan men basqa olımpıadalyq nysandarǵa keledi. Qalyptasqan dástúr boıynsha, Italııaǵa álemniń basqa elderinen kóptegen qaýipsizdik agentteri kelip, óz delegatsııalaryn qorǵaıdy jáne jalpy jergilikti kúshterge tártipti qamtamasyz etýge kómektesedi.
2025 jylǵy sáýirde uıymdastyrýshylar qaıta qaralǵan jalpy operatsııalyq bıýdjetti jarııalady, onyń kólemi «shamamen 1,7 mıllıard eýro» bolyp, burynǵy josparlanǵan somadan 100 mıllıon eýroǵa kóp bolyp shyqty.
Italııalyq baspasóz narazylyqtar da bolýy múmkin ekenin jazdy. Túrli narazylyq bildirýshiler 7 aqpanda pıket ótkizýdi jáne basqa da aýqymdy bastamalardy josparlap otyr.
Oıyndar ótip jatqan kúnderi metronyń jumysy túngi 2-ge deıin uzartyldy, al kólik jelisinde – jer ústi kóliginiń kestesi kúsheıtildi (14 jeli tańǵy 5:30-ǵa deıin jumys isteıdi), sondaı-aq qoǵamdyq kólik pen qyzmettik kólikterge kedergi bolmaıtyndaı etip 90-91 avtojol ýchaskesinde mototsıkl qozǵalysy shekteldi. Bul qaǵıdalar aımaqtyq úkimettiń Olımpıada (6–22 aqpan) jáne Paralımpıada (6–15 naýryz) oıyndary kezeńinde kúshine enedi.
Mılan men Kortınanyń qysqy Olımpıada oıyndary úshin kıberqaýipsizdikti qadaǵalaýǵa arnalǵan tótenshe qaýipsizdik sharalary engizildi. Osy maqsatta tosyn jaıttar men kıbershabýyldardy sheshý úshin táýlik boıy jumys isteıtin operatsııalyq ortalyq quryldy.
2025 jyly qarasha aıynyń sońynda Mılan men Kortınanyń qory Italııa Іshki ister mınıstrliginiń Qoǵamdyq qaýipsizdik departamentimen kelisimge qol qoıdy. Kıberqylmyspen kúres jáne mańyzdy ınfraqurylymdy qorǵaý ulttyq ortalyǵy (Cnaipic) jáne aımaqtyq kıberqaýipsizdik ortalyqtaryna (Lombardııa kıberqaýipsizdikti basqarý ortalyǵy jáne Veneto men Trentıno-Alto-Adıdje poshtalyq polıtsııa ortalyqtary) kıbershabýyldar jaǵdaıynda qorǵanys jáne áreket etý strategııalary men protsedýralaryn ázirleý tapsyryldy, bul úshin ishki tótenshe baılanys pen derekter almasýǵa arnaıy qurylǵan jeli qoldanylady.
Ekologııaǵa qaýip
2026 jylǵy qysqy Olımpıada oıyndaryn ótkizýge ótinishinde uıymdastyrýshylar ekonomıkalyq jáne ekologııalyq turaqtylyqqa basymdyq berýdi ýáde etken edi. Degenmen, bul turaqty damý ýádesi berilgen, biraq iske aspaǵan alǵashqy jaǵdaı emes, dep jazady DW.
Máselen Alpi taýlarynyń názik ekojúıesi úlken qysymǵa ushyraýy múmkin: jańa lıftter, jasandy qar jasaý úshin sý qoımalary, taý betkeıleri men joldar salynady. Ásirese qardyń tapshylyǵy artyp kele jatqan jaǵdaıda, orta jáne tómen betkeılerdi jasandy qarmen jabýǵa týra keledi — qar shashatyn qurylǵyny paıdalaný men týrıstik aǵynnyń artýy aımaqqa qosymsha júkteme artyp, jergilikti ekojúıege qaýip tóndiredi.
Daýdyń basy – Kortınanyń jańa trassasyn salý boldy, onda bobsleı, skeleton jáne shana sportynan jarystar ótedi. Trassa úshin 500-600 jyldyq aǵashtardy kesýge týra kelgen. Sonymen qatar, bolashaqta trassany paıdalaný jáne tehnıkalyq qyzmet kórsetý shyǵyndary Italııanyń memlekettik qazynasyna aýyr salmaq bolady.
Italııa turǵyndarynyń kóńil-kúıi
Olımpıada demeýshisi Coca-Cola tapsyrysymen ıtalıandyq SWG áleýmettik zertteý kompanııasy saýalnama ótkizgen. Onda ıtalııalyqtardyń 62%-y qysqy Olımpıada oıyndaryn ótkizýimen maqtanady, al 59%-y bul oqıǵany ulttyq birlikti nyǵaıtýdyń bir quraly dep sanaıdy.
Sol zertteý nátıjesine sáıkes, saýalnamaǵa qatysqandardyń shamamen 70%-y Olımpıadany qyzyǵýshylyqpen qaraıtynyn aıtqan. 30 jasqa deıingi jastar arasynda bul kórsetkish shamamen 65%-di quraıdy.
Degenmen, kóptegen sporttyq nysandar qysqy Olımpıada kezinde áli qurylys alańy bolyp qala beredi. Keıbir joldar qurylysynyń keshigýi erekshe alańdaýshylyq týdyryp otyr jáne kóptegen adam bul jaǵdaı jol qozǵalysynda eleýli qıyndyqtar týǵyzýy múmkin dep qorqady.
Bıletter baǵasy
Bıletterdi «tickets.milanocortina2026.org» resmı saıty arqyly satyp alýǵa bolady. Kóptegen tanymal sharalar (ásirese hokkeı, mánerlep syrǵanaý, saltanatty rásimder) qazirdiń ózinde satylyp ketken nemese tek qymbat bıletter qalǵan. Ár sársenbi kúni, Eýropa ýaqyty boıynsha saǵat 16:00-de keıbir dıstsıplınalarǵa qosymsha bıletter satylady (mysaly, 14 qańtarda arnaıy baǵamen sliding sports pen kerlıngke arnalǵan oryndar qosyldy).
Bıletterdiń jalpy baǵasy eń arzannan (30 evro, hokkeıdiń aldyn ala matchtary nemese keıbir sport túrleriniń alǵashqy aınalymdary) premıým kategorııaǵa deıin (fınaldar, saltanatty rásimder) 1000-2800 eýroǵa deıin ózgerip otyrady.
Mysaly:
Ashylý saltanatyn tamashalaý — 260-2026 eýro
Jabylý saltanaty (22 aqpan, Verona arenasy) — 950-2800 eýro.
Aıta keteıik, Italııada ótetin XXV qysqy Olımpıada oıyndaryna Qazaqstan quramasy sapynda 36 sportshy qatysatyn boldy.