Qysqy maýsymda jazǵy dońǵalaqpen júrgen júrgizýshige qansha aıyppul salynady
ASTANA. KAZINFORM – Elimizde resmı túrde kólik júrgizýdiń qysqy maýsymy 1 jeltoqsanda bastalady. Osy oraıda Kazinform dońǵalaǵyn ýaqtyly aýystyrmaǵan júrgizýshilerge zań boıynsha qansha aıyppul salynatynyn anyqtap kórdi.
Іshki ister mınıstrliginiń baspasóz qyzmeti usynǵan resmı málimetterge saı, M1 jáne N1 sanattaǵy avtomobılder jazǵy kezeńde (maýsym, shilde, tamyz) qysqy shınalarmen jabdyqtalǵan bolsa, al qys mezgilinde (jeltoqsan, qańtar, aqpan) qysqy shınalar ornatylmaǵan bolsa, kólikti paıdalanýǵa tyıym salynady.
«Bul shekteýler sáıkesinshe Keden odaǵynyń «Dońǵalaqty kólik quraldarynyń qaýipsizdigi týraly» tehnıkalyq reglamentiniń 5.5-tarmaǵymen (Keden odaǵy Komıssııasynyń 2011 jylǵy 9 jeltoqsandaǵy №877 bekitilgen sheshimi) jáne osy qosymshanyń 5.6.3-tarmaǵymen retteledi.
Joǵarydaǵy tehnıkalyq reglamenttiń 5.5-tarmaǵy boıynsha ereje buzǵany úshin ÁQBtK 590-babynyń 5-bóligimen ákimshilik jaýapkershilik kózdelgen, ıaǵnı bes aılyq eseptik kórsetkish mólsherinde aıyppul salýǵa ákep soǵady» delingen ІІM habarlamasynda.
2024 jyly bul aıyppul somasy - 18 460 teńge.
Bul jerde atap óterligi, M1 sanatyna jeńil avtomobılder jatady. Olar — jolaýshy tasymaldaýǵa arnalǵan jáne júrgizýshiniń ornynan bólek taǵy segiz oryndyqpen jabdyqtalǵan kólikter.
Al, N1 sanatyna júk avtomobılderi jáne olardyń shassıi, ıaǵnı júk tasymaldaýǵa arnalǵan jáne eń joǵary salmaǵy 3,5 tonnadan aspaıtyn kólikter jatady.
«Sh» belgisi erikti túrde taǵylady
Elimizde 2016 jyly shegesi bar qysqy dońǵalaq ornatylǵan kólikke «Sh» taný belgisin taǵý mindettelgen bolatyn. Bul ózgeris kóp uzamaı naryqta «Sh» taný belgisin satýǵa qatysty dúrbeleń týdyryp, qoǵamnyń narazylyǵyna ushyrady. Kelesi jyly arnaıy Úkimet qaýlysy shyǵyp, Jol qozǵalysyna qatysty zańǵa ózgerister engizilip, bul talap alynyp tastalǵan edi.
«Kólik quraldaryn paıdalanýǵa jiberý jónindegi negizgi erejelerdiń 9-tarmaǵyna sáıkes (Qazaqstan Respýblıkasy Úkimetiniń 2014 jylǵy 13 qarashadaǵy №1196 qaýlysymen bekitilgen) shınalary bar mehanıkalyq kólik quralynyń artynda «Sh» taný belgisi júrgizýshiniń qalaýy boıynsha ornatylady. Osy tarmaq boıynsha Ákimshilik quqyq buzýshylyq týraly kodeksinde (budan ári – ÁQBtK) ákimshilik jaýapkershilik kózdelmegen», - dep habarlaıdy QR ІІM baspasó qyzmeti.
Sondaı-aq, vedomstvo bıyl jyl basynan beri ÁQBtK 590-baby 5-bóligi boıynsha 162 myńnan astam ákimshilik hattama toltyrylǵanyn málimdedi.
Aıta keteıik, sońǵy kúnderi elimizdiń soltústik oblystarynda tolassyz qar jaýyp, jol qozǵalysyn qıyndatty. Ótken demalys kúnderi Astanada 200-den astam kólik oqıǵasy tirkeldi.
