Qysqy maýsym: avtokólik shınalaryn tańdaǵanda nege mán berý kerek
ASTANA. KAZINFORM – Qys mezgilinde kólik júrgizýshileriniń basty nazarynda bolýy tıis máseleniń biri – qysqy shınalardy ýaqtyly jáne durys tańdaý. Bul – jol qozǵalysy qaýipsizdigin qamtamasyz etýdiń mańyzdy quramdas bóligi.
Qysqy shınalardyń negizgi túrleri
QazAvtoJol málimetinshe, avtokólikterge arnalǵan qysqy shınalar úsh negizgi túrge bólinedi.
Birinshisi - shegeli shınalar. Olar muzdy jáne kóktaıǵaq joldarda joǵary ilinisý qasıetine ıe. Mundaı shınalar aýa temperatýrasy jıi tómendep, muz qatatyn aımaqtarǵa qolaıly.
Ekinshisi - frıktsııalyq (jabyspaly) shınalar. Bul túri qala jaǵdaıynda jáne jumsaq klımatta tıimdi. Olar qar men dymqyl asfaltta jaqsy nátıjesin kórsetedi, alaıda qatty muzda tıimdiligi tómendeıdi.
Úshinshisi - jyl boıǵy shınalar. Ortasha qys jaǵdaıyna jaramdy, alaıda qatty aıaz jáne kóktaıǵaq kezde arnaıy qysqy shınalarǵa qaraǵanda az tıimdi.
Tehnıkalyq talaptar
Mamandardyń aıtýynsha, qysqy shınalardy tańdaýda birqatar tehnıkalyq kórsetkishterge nazar aýdarý qajet.
Jyldamdyq jáne júkteme ındeksi. Tańdalǵan shınalar kóliktiń tehnıkalyq sıpattamalaryna sáıkes bolýy tıis. Bul kórsetkish shınanyń ruqsat etilgen eń joǵary jyldamdyǵy men kótere alatyn salmaǵyn aıqyndaıdy.
Protektor tereńdigi. Qysqy shınalardyń protektorynyń tereńdigi keminde 4 mıllımetr bolýy kerek. Bul kórsetkish jolmen ilinisý sapasyna jáne kóliktiń turaqtylyǵyna tikeleı áser etedi.
Qoldaný merzimi. Tájirıbe boıynsha bes jyldan asqan shınalardy paıdalaný usynylmaıdy, sebebi ýaqyt óte kele olar óziniń serpimdilik qasıetin joǵaltady.
Zańnamalyq talaptar
Keden odaǵynyń «Dóńgelekti kólik quraldarynyń qaýipsizdigi týraly» tehnıkalyq reglamentine (TR TS 018/2011) sáıkes, 1 jeltoqsan men 28 (29) aqpan aralyǵynda barlyq M1, N1, N2 jáne N3 sanatyndaǵy kólikter (jeńil avtomobılder, júk kólikteri jáne avtobýstar) qysqy shınalarmen jabdyqtalýy tıis. Qysqy shınalarda mindetti túrde M+S nemese taý beınesindegi qar ulpasy belgisi (3PMSF) bolýy qajet. Atalǵan talaptardy buzǵan jaǵdaıda júrgizýshiler Qazaqstan Respýblıkasynyń qoldanystaǵy zańnamasyna sáıkes ákimshilik jaýapkershilikke tartylady.
Qaýipsizdik jáne kútim sharalary
Sarapshylar qysqy kezeńde shınalardy udaıy tekserip otyrýdyń mańyzyn atap ótedi. Sýyq aýa raıynda shınalardaǵy qysym tómendeıdi, bul kólik basqarylýyna jáne otyn shyǵynyna áser etedi. Shınalardyń jaryq, tilim jáne tozý belgilerin der kezinde anyqtap, aýystyrý qajet.
Dóńgelekterdiń teńgerimi (balansırovkasy) buzylǵan jaǵdaıda shınalardyń merziminen buryn tozýy jáne kóliktiń turaqtylyǵynyń tómendeýi múmkin.
Qysqy shınalardy ýaqtyly ornatyp, olardy durys paıdalaný árbir júrgizýshiniń qaýipsizdiginiń kepili. Kólikti qysqy maýsymǵa aldyn ala daıyndaý arqyly júrgizýshiler óz ómirin jáne ózgelerdiń qaýipsizdigin saqtaıdy.
Buǵan deıin kólik shınasyn qaı ýaqytta aýystyrý kerek ekenin jazǵan bolatynbyz.