Qysqy dóńgelek taqpaǵan júrgizýshilerge qansha aıyppul salynady
ASTANA. KAZINFORM — Qazaqstanda 2026 jyly jazǵy dóńgelekterdi qysqyǵa qashan aýystyrý kerek jáne aıyppul mólsheri qandaı
Kún sýyta bastaǵan kezde júrgizýshilerge kólikterin qysqy maýsymǵa aldyn ala daıyndaý usynylady. Qysqy shınalarǵa qashan aýysý qajet jáne talaptardy buzǵany úshin qandaı aıyppul qarastyrylǵan.
Qostanaı oblysy polıtsııa departamenti ákimshilik polıtsııa basqarmasynyń jol jáne tehnıkalyq ınspektsııa tobynyń ınspektory Dınara Nurǵalıevanyń aıtýynsha, Keden odaǵynyń «Dóńgelekti kólik quraldarynyń qaýipsizdigi týraly» tehnıkalyq reglamentine sáıkes, 1 jeltoqsannan aqpan aıynyń sońyna deıin jeńil avtokólikterdiń qysqy dóńgeleksiz júrýine tyıym salynady.
— Qysqy dóńgelek kóliktiń barlyq dóńgelegine ornatylýy tıis. Tehnıkalyq reglament talaptaryna sáıkes kelmeıtin avtokólikti basqarǵany úshin ákimshilik jaýapkershilik qarastyrylǵan. Eger quqyq buzý bir jyl ishinde qaıtalansa, jaza qatańdatylady, — dedi Dınara Nurǵalıeva.
2026 jyly belgilengen merzimde qysqy shınalardy paıdalanbaǵany úshin aıyppul 5 aılyq eseptik kórsetkishti (AEK), ıaǵnı 21 625 teńge. Ákimshilik jaza qoldanylǵannan keıin bir jyl ishinde quqyq buzý qaıtalansa, aıyppul 20 AEK-ke nemese 86 500 teńgege deıin ósedi.
Polıtsııa júrgizýshilerge alǵashqy aıaz ben kóktaıǵaqty kútpeı, kólikterin qysqy maýsymǵa aldyn ala daıyndaýǵa keńes beredi.
— Júrgizýshilerdi alǵashqy qar men kóktaıǵaqty kútpeı, shınalardy ýaqytyly aýystyrýǵa, jyldamdyq rejımin saqtaýǵa jáne qaýipsiz araqashyqtyq ustaýǵa shaqyramyz. Joldaǵy qaýipsizdik qozǵalysqa qatysýshylardyń árqaısysynyń jaýapkershiligine baılanysty, — dep atap ótti ınspektor.
Eske salaıyq, 17–19 qazan aralyǵynda Qazaqstanda jańbyr men qar jaýyp, aýa temperatýrasy kúrt qubylady dep kútilýde.
