Qysqy Azııa oıyndaryna kil myqtydan kim barady

ASTANA. KAZINFORM — Qytaıdyń Harbın qalasynda ótetin Qysqy Azııada oıyndaryna el sportshylarynyń úsh quramy da tirkelgen. Biraq, baıraqty básekege kim qatysatynyn bapkerler anyqtaıdy.

Ulttyq olımpıada komıtetiniń málimetinshe, qazirgi ýaqytta Qysqy Azııa oıyndaryn uıymdastyrýshylarmen atalǵan baıraqty básekege Qazaqstannyń sport delegatsııasynyń qatysýyn uıymdastyrý máseleleri boıynsha qarqyndy jumys júrgizilip jatyr. Elimizdiń sportshylary 9-Qysqy Azııa oıyndary baǵdarlamasyna kirgen sporttyń 11 túriniń 10-yna qatysýdy josparlap otyr.

Olar mynalar:

1. Konkımen júgirý sporty;
2. Short-trek;
3. Mánerlep syrǵanaý;
4. Hokkeı;
5. Kerlıng;
6. Taý shańǵysy sporty;
7. Shańǵy jarysy;
8. Frıstaıl (tek akrobatıka);
9. Bıatlon;
10. Skı-alpınızm (shańǵy alpınızmi, sporttyń jańa túri).

Qazaqstan sportshylary snoýbord jarystaryna qatyspaıdy. 

— Búginde Harbın-2025 Azııa oıyndarynyń akkredıtteý júıesine 450-den astam adam tirkeldi. Tirkelgen tulǵalardyń basym bóligin sportshylar quraıdy. Óıtkeni, aldyn ala ótinim sportshylardyń úsh quramymen berilgen. Al Oıyndar jaqyndaǵanda bapkerlerge qatysýshylardyń tirkelgen tiziminen Qazaqstan atynan Qytaıda kim óner kórsetetindigin anyqtaýǵa týra keledi, — dedi Ulttyq olımpıada komıtetinen.

Jarystar bir birinen 260 shaqyrym qashyqtyqta ornalasqan eki túrli klasterde, atap aıtqanda muz ústindegi sport túrleri Harbınde, al shańǵy sporty túrleri ıAbýlıde ótedi. Alǵashqy jarystar oıyndardyń resmı ashylý saltanaty bolmaı turyp bastap ketedi. Óıtkeni, keıbir jarys túrlerine Oıyndarǵa bólingennen uzaǵyraq ýaqyt qajet.

— Osyǵan baılanysty sportshylar túrli qalada bolady. Barlyǵyna arnalǵan biryńǵaı qalashyq bolmaıdy. Delegatsııanyń barlyq múshesi oıyndy uıymdastyrý komıteti belgilegen mamandandyrylǵan, akkredıttelgen qonaq úılerge ornalastyrylady, — dedi komıtetten.

Aıta ketelik, Azııa oıyndarynda Qazaqstan quramasy qandaı forma kıetinin jazǵan bolatynbyz.