Qysqy Azııa oıyndary: Qytaı quramasynda óner kórsetken tórt qazaq úsh «altyn» eki «qola» aldy
HARBIN.KAZINFORM – Qytaıdyń Harbın qalasynda ótip jatqan ІH qysqy Azııa oıynndaryna Qytaı ulttyq quramasy sapynda ulty qazaq tórt sportshy qatysyp, tórteýi de júlde túǵyrynan kórindi.
Eń áýeli, Samǵar Serikuly erler arasynda shańǵymen syrǵanaýdan sprınt baǵdarlamasynda óner kórsetip, 2 mınýt 58.51 sekýnd nátıjesimen qola medal enshiledi.
Dál osy synda qazaqstandyq Konstantın Bortsov «kúmis» enshilegen bolatyn. Sportshylar máre syzyǵyn úshinshi jáne tórtinshi bolyp keskenimen, ekinshi oryn alǵan japondyq sportshy ereje buzýyna baılanysty nátıjesi joıyldy.
Sol sebepti, Konstantın Bortsov «kúmis» alsa, qandasymyz Samǵar Serikuly qola júldeger atandy.
Qazaq qyzy Baıan Jalynqyzy shańǵy jarysynan áıelder arasynda 5 shaqyrymǵa syrǵanaýdan (erkin stıl) 12 mınýt 07.5 sekýnd nátıje kórsetip, Harbın qysqy Azııa oıyndarynyń chempıony atandy.
Aıta keterligi, osy jarysqa qazaqstandyq sportshylar Darıa Rıajko, Nadejda Stepashkına, Ksenııa Shalygına jáne Angelına Shýryga qatysty. Qortyndysynda Nadejda Stepashkına máre syzyǵyn besinshi kesse, Ksenııa Shalygına jetinshi, Angelına Shýryga men Darıa Rıajko segizinshi-toǵyzynshy orynnan kórindi.
Qanaǵat Muhammeduly Qytaı qorjynyna eki birdeı júlde saldy. Ol aldymen 5000 metr qashyqtyqqa konkımen júgirýden qola medalǵa qol jetkizdi. Qandasymyz atalǵan qashyqtyqty 6:31.54 sekýndta júgirip ótti.
Sonymen qatar, Qanaǵat Qytaı quramasy sapynda Konkımen júgirýden erler arasynda komandalyq iz qýý dodasynda altyn medaldy jeńip aldy.
Qytaı quramasynyń sportshysy Aqnar Adaqqyzy áıelder arasynda konkımen júgirýden komandalyq iz qýý jarysynda Azıada chempıony boldy. Qytaı quramasynyń nátıjesi – 3 mınýt 02.75 sekýnd.
Aıta keterligi, osy jarysta qazaqstandyq Nadejda Morozova, Krıstına Shýmekova jáne Marııa Degen jarys jolyna shyǵyp, ókinishke qaraı júldege iline almady.
Osylaısha, Qytaı quramasyndaǵy 4 qazaq sportshysy qysqy Azııa oıyndarynda 3 altyn jáne 2 qola medal enshiledi.
Keshe, Baıan Jalynqyzy jáne Samǵar Serikuly Kazinform tilshisine eksklıýzıvti suhbat berip, Qazaqstandyqtarǵa jalyndy sálem joldaǵan bolatyn.