Qysqy Azııa oıyndary: Qazaqstannan týdy kimder ustap shyǵady

ASTANA. KAZINFORM – Qańtar aıynyń aıaǵynda IX qysqy Azııa oıyndaryna Qazaqstan sportshylaryn shyǵaryp salý rásimi ótedi. Bul týraly Úkimet otyrysynda QR Týrızm jáne sport mınıstri Erbol Myrzabosynov málim etti.

- Azııa oıyndaryna shyǵaryp salý rásimin 30 qańtar kúni Astana qalasyndaǵy «Qazaqstan» jeńil atletıka sport kesheninde ótkizý josparlanyp otyr. Úmitkerlerdiń arasynda joǵary sporttyq jetistikter men múmkindikterge ıe sportshylar qamtylǵan. Bıatlonnan 2023 jylǵy qysqy Ýnıversıadanyń júldegeri Aleksandr Mýhın jáne 2019 jylǵy Ýnıversıadanyń eki dúrkin júldegeri Áset Dúısenov, shańǵy jarystarynan Nadejda Stepashkına, konkımen júgirý sportynan Nadejda Morozova, Altaı Járdembekuly, sondaı-aq short-trekten Azııa oıyndarynyń qola júldegeri Abzal Ájiǵalıev jáne 2024 jylǵy álem chempıonatynyń kúmis júldegeri Denıs Nıkısha bar, - dedi E.Myrzabosynov.

Onyń aıtýynsha, frıstaıl-akrobatıkadan aıtarlyqtaı perspektıvasy bar sportshylar: 2023 jylǵy Eýropa kýbogy kezeńiniń jeńimpazy Sherzod Hashırbaev, 2023 jylǵy Eýropa kýbogynyń qola júldegeri Aıana Joldas.

- Atalǵan sportshylar elimizdiń júldeler qorjynyna óz úlesin qosady dep úmittenemiz. Ulttyq quramalardyń daıyndyǵynyń jaýapkershiligi 10 dıstsıplına boıynsha bas bapkerlerge júkteledi. Olar – sportshylardyń sátti óner kórsetýine barlyq kúsh-jigerin salatyn bilikti mamandar. Qazaqstandyq bapkerlermen qatar, sportshylardy sapaly daıyndaý úshin Nıderlandy, Polsha, Slovenııa, Belarýs jáne Reseı Federatsııasynan 9 jattyqtyrýshy-konsýltant tartyldy. Olar sporttyń 4 túri boıynsha jumys isteıdi: bıatlon, konkımen júgirý sporty, short-trek jáne mánerlep syrǵanaý, - dedi mınıstr.

Sonymen qatar vedomstvo basshysy Azııa oıyndaryndaǵy tý ustaýshylardy atady. Beketaev Ádil Maratuly – Qazaqstan Respýblıkasynyń hokkeıden sport sheberi, jastar arasyndaǵy álem chempıonatynyń qola júldegeri jáne jeńimpazy. Tıhonova Olga Aleksandrovna – short-trekten halyqaralyq dárejedegi sport sheberi, 2017 jyly ótken Azııa oıyndarynyń qola júldegeri, sondaı-aq Dúnıejúzilik Ýnıversıada júldegeri.

Budan buryn habarlanǵandaı, Qytaıda ótetin IX qysqy Azııa oıyndaryna Qazaqstannan 138 sportshy barady.