Qazaqstan sportshylarynyń Qysqy Azııa oıyndaryna kıetin formasyn demeýshiler tigip berdi
ASTANA. KAZINFORM – Qytaıda ótetin IX qysqy Azııa oıyndaryna qatysatyn qazaqstandyq sportshylardyń formasyn daıyndaýǵa el bıýdjetinen qarajat bólingen joq. Bul týraly Týrızm jáne sport mınıstri Erbol Myrzabosynov málim etti.
- Sportshylardyń formasy uıymdastyrý komıtetimen kelisilip, qysqy olımpıada standarttaryna saı, ıaǵnı Harbınniń aýa raıyna saı tigildi. Sportshylar, basqa da sport mamandary tarapynan jaqsy qabyldandy. Sporttyq kıim demeýshilerdiń tarapynan tigilip, syılyq retinde berilip otyr - dedi Erbol Myrzabosynov Úkimet otyrysynan keıin ótken baspasóz máslıhatynda.
Osylaısha, mınıstr sportshylardyń formasyn daıyndaýǵa bıýdjetten qarjy bólinbegenin aıtyp otyr.
Aıta keteıik, qysqy Azııa oıyndarynda Qazaqstan sportshylary 51 medal jıyntyǵy úshin kúresedi.
Aıtýly sport básekesinde elimizdiń namysyn 138 sportshy qorǵaıdy.
