Qysqy Azıada: Harbındegi bas medıa ortalyǵynan fotoreportaj
HARBIN. KAZINFORM – Qytaıdyń Harbın qalasynda ótip jatqan IX qysqy Azııa oıyndary búgin resmı ashyldy. Osy oraıda Kazinform tilshisi bas medıa ortalyǵyǵan (BMO) fotoreportaj usynady.
Qysqy Azıa oıyndarynyń bas medıa ortalyǵy ashylý saltanaty ótetin Harbın halyqaralyq kórme jáne sport ortalyǵy janynda ornalasqan. Ortalyq qysqy Azııa oıyndary úshin mańyzdy ınfraqurylymdyq nysan sanalady.
Bul ortalyq jarys barysynda buqaralyq aqparat quraldary men jýrnalısterge aqparat taratý men kommýnıkatsııany qamtamasyz etý úshin arnaıy qurylyp otyr.
Bas medıa ortalyq eki bólikke bólingen: negizgi jańalyqtar ortalyǵy jáne halyqaralyq habar taratý ortalyǵy.
Sondaı-aq tirkelgen BAQ tilshileri men habar taratýshylarǵa qoldaý kórsetý úshin onlaın-jańalyqtar ortalyǵy, baspasóz máslıhaty zaly jáne suhbat alańy sııaqty 11 fýnktsıonaldy aımaqtary bar.
Harbın qysqy Azııa oıyndarynan 500-ge jýyq BAQ jýrnalısi aqparat taratyp jatyr. Al translıatsııa quqyǵy bar habar taratýshylardyń sany 800-den astam adamǵa jetken. Olardyń tórtten birinen kóbi nemese 200-den astamy sheteldik BAQ tilshileri.
Ekinshi qabattaǵy mádenı kórme alańynda, qysqy Azııa oıyndarynyń damý tarıhy men tamasha jetistikteri kórsetilgen.
Harbın qalasy – Qytaıdyń mádenı astanalarynyń biri. Sondyqtan kórme alańynda Qytaıdyń sýret óneri, mýzykasy, bı óneri men ulttyq qolóneri, sondaı-aq atalǵan eldiń qysqy sporttyq mádenıeti kórermenderge keńinen tanystyrylǵan.
Ortalyqta jýrnalıster úshin tamaqtaný oryny bar. Azııa oıyndaryna qatysýshy elderdiń mádenıetine qurmet kórsetý maqsatynda halal jáne vegetarıandyq taǵamdar da usynylǵan. Sonymen qatar dástúrli qytaı taǵamy men eýropalyq taǵam mázirleri de bar.
Jumys úrdisi barysynda jýrnalıster men medıa qyzmetkerlerine tez daıyndalatyn taǵamdar men sýsyndar, ystyq sháı-kofe, jemister jáne jeńil tiske basar táttiler qoljetimdi.
Aıta keterligi, ortalyqta ınteraktıvti kommýnıkatsııa júıesi qoldanylǵan. AI dıktorlary — jasandy ıntellektke negizdelgen júıeler, olar mátinderdi dybystaý, aqparatty naqty jáne jyldam jetkizý, sondaı-aq aýdıtorııamen ınteraktıvti baılanys ornatý úshin qoldanylady.
Harbın qysqy Azııa oıyndaryna Azııanyń túrli elderinen kelgen jýrnalıster aqparat taratyp jatyr. AI dıktory kóptildi qoldaýdy usyna alady, ıaǵnı qytaı, aǵylshyn, orys, japon, koreı jáne basqa da tilderde aqparat taratýǵa múmkindik beredi. Bul halyqaralyq aýdıtorııanyń barlyǵyna qoljetimdilikti arttyrady.
Aıta keteıik, buǵan deıin Harbındegi atletter qalashyǵy týraly jazǵan bolatynbyz.