Qysqy Azıada: Harbındegi atletter qalashyǵy jaıly ne bilemiz
HARBIN. KAZINFORM – Qytaıdyń Harbın qalasynda ótetin IX qysqy Azııa oıyndarynyń resmı ashylýyna nebári 1 kún qaldy. harbin2025.com resmı saıtynyń habarlaýynsha, 24 elden kelgen 900-den asa sportshy Harbin Victories qonaqúıine (atletter qalashyǵy) ornalasty.
Harbin Victories Hotel – Harbındegi eń tanymal tórt juldyzdy qonaqúıleriniń biri. Ǵımarattyń jalpy aýdany 60 000 sharshy metrdi quraıdy. 39 qabattan turatyn nysanda 618 qonaq bólmesi, konferentsııa zaly, qoǵamdyq tamaqtaný orny, saýda ortalyǵy jáne dene shynyqtyrý zaldary bar.
Qonaqúı dırektordyń atqarýshy orynbasary Manınnyń aıtýynsha, qonaqúı meıramhanasy bir ýaqytta 400 adamdy qabyldaı alady jáne sportshylarǵa táýligine 20 saǵat tańǵy, túski, keshki jáne túngi as beredi.
– Sportshylardyń talǵamyna saı kelý úshin aldyńǵy is-sharalardy uıymdastyrý tájirıbesimen jáne aımaqtyq taǵamdardyń ereksheligin eskere otyryp, mázir neǵurlym baı jáne ártúrli jasaldy. Mysaly, meıramhana ystyq tamaq aımaǵy, salqyn tamaq aımaǵy jáne sýsyn aımaǵyna bólinip, Qytaı, Ońtústik-Shyǵys Azııa, Shyǵys Azııa jáne Eýropalyq as máziri daıyndaldy. Sonymen qatar túrli elder men aımaqtardan kelgen jáne ártúrli mádenı-dinı nanymdaǵy sportshylardyń qajettilikterin qanaǵattandyrý úshin jeke halal taǵam aımaǵy ashyldy, - dedi Manın.
Onyń aıtýynsha, azyq-túlik qaýipsizdiginiń qamtamasyz etý úshin Atletter qalashyǵy azyq-túlikti paıdalaný jáne saqtaý, tasymaldaý, asúı tazalyǵy jáne tamaqtaný protsesin jiti qadaǵalaıdy.
Sportshylardyń jarystan keıingi tynyǵýyn qamtamasyz etý maqsatynda, bólmelerdi barynsha keń jáne jaryq etip qoıǵan. Ár bólme jaıly tósek oryn, ústel jáne basqa da jıhazdarmen, sondaı-aq ylǵaldandyrǵysh, jeke dárethana, dýsh, qoljýǵysh sııaqty quraldarmen jabdyqtalǵan.
Manınnyń aıtýynsha, atletter qalashyǵy halqaralyq standarttarǵa saı jabdyqtalǵan. Munda sportshylarǵa medıtsınalyq kómek kórsetý úshin arnaıy medpýnkt jasaqtalǵan. Bul jerde ishki aýrýlar, hırýrgııa, ÝDZ jáne dárihana sııaqty 8 bólim bar ekenin kórýge bolady. Medpýnkt medıtsınalyq jabdyqtarmen tolyq qamtamasyz etilip, 56 medıtsına qyzymetkeri sportshylardyń densaýlyǵyn sát saıyn qadaǵalap otyrady.
Atletter qalashyǵynda sondaı-aq buqaralyq aqparat ortalyǵy, delegatsııa basshylaryna arnalǵan májilis zaly, OSA keńsesi, dopıng-baqylaý pýnkty, medıtatsııa bólmesi jáne basqa da fýnktsıonaldyq aımaqtar bar.
Aıta keteıik, IX qysqy Azııa oıyndary 2025 jyldyń 7-14 aqpany aralyǵynda Qytaı Halyq Respýblıkasy Heılýntszıan provıntsııasynyń Harbın qalasynda ótedi. Sportshylar 11 sport túri boıynsha 64 medal jıyntyǵyn sarapqa salady.