Qysqa daıyndyq: Tarazda qubyrlar aýystyrylyp jatyr
TARAZ.KAZINFORM — «AMANAT» partııasynan saılanǵan Májilis depýtattary Muqash Eskendirov pen Gúldara Nurym Taraz qalasyndaǵy M-1 qalalyq jylý magıstralin qaıta jańartý jobasynyń júzege asyrylý barysyn tekserdi.
Qazir Tarazda jylý jelilerin qaıta jańartý jumystary jalǵasyp jatyr. Ótken jyly 4602 metr qubyr aýystyryldy, bıyl jyl sońyna deıin taǵy 1 536 metri jańartylady. Muqash Eskendirov bul tek bir ǵana magıstraldi jóndeý emes, sondaı-aq ınfraqurylymdy jańǵyrtýdyń júıeli qadamy ekenin aıtty. «AMANAT» partııasy mundaı jumystarǵa basty basymdyqtardyń biri retinde qaraıdy.
— Adamdardyń ómir súrý sapasyn arttyrý úshin eń aldymen úılerde jylý, ystyq sý jáne káriz júıesiniń durys jumys isteýi qajet. Tarazda jylý jelileri máselesi ondaǵan jyl boıy sheshilmeı kelgen. Endi buǵan kóz juma qaraýǵa bolmaıdy. Turǵyndar qysqy sýyqta jylýdan taryqpaıtynyna senip ómir súrýi kerek, — dedi Muqash Eskendirov.
Jobanyń jalpy quny 10 mıllıard teńgeden asady. Tapsyrys berýshi — qala ákimdigi, merdiger — «Saryaǵash-Aman» kompanııasy. Tehnıkalyq jáne avtorlyq qadaǵalaýdy kásibı mamandandyrylǵan uıymdar júzege asyrady. Joba aıaqtalǵannan keıin Taraz qalasyndaǵy jylý jelileriniń tozýy 67 paıyzdan 51 paıyzǵa deıin tómendemek.
Gúldara Nurymnyń aıtýynsha, Jambyl oblysy «AMANAT» partııasynyń saılaýaldy baǵdarlamasy, sondaı-aq depýtattar ázirlegen «Jylý energetıkasy týraly» zańnyń naqty júzege asyrylýynyń úlgisin kórsetip otyr. Zańda senimdilik, qaýipsizdik jáne jylytý maýsymyna daıyndyq boıynsha qatań talaptar belgilengen.
— Halyq eger partııa ýáde berse, ony oryndaıtynyna kóz jetkizýi kerek. Biz qur sózben shektelmeımiz, ár aımaqta turǵyn úı men kommýnal salasynda, medıtsınada, gazdandyrýda naqty nátıjege jumys isteımiz. Tarazda biz osynyń naqty mysalyn kórip otyrmyz. Qarjy bólindi, merdiger jumys istep jatyr, qubyrlar aýystyrylýda, turǵyndar naqty ózgeristi kórip otyr, — dedi Gúldara Nurym.
Oblysta barlyǵy 9 jylý energııa kesheni jáne 593 avtonomdy qazandyq jumys isteıdi. Tarazda 1025 kópqabatty turǵyn úıdiń 921-i jazǵy ýaqytta ystyq sýmen qamtylǵan. Qalǵan 104 úıge jóndeý jumystary aıaqtalǵan soń ystyq sý beriledi. Jalpy oblysta 2025-2026 jyldardaǵy jylý berý maýsymyna daıyndyq kestege saı júrgizilip jatyr.
«AMANAT» partııasynyń saılaýaldy baǵdarlamasyn iske asyrý aıasynda Jambyl oblysy boıynsha 2027 jylǵa deıin 26,8 shaqyrym jylý jelisin, 1,2 myń shaqyrym elektr jelisin jóndeý jáne qaıta jańartý josparlanǵan.