Jylytý maýsymy, kóktemgi sý tasqyny: Bozymbaev óńirlerdiń daıyndyǵyn tekserdi
ASTANA. KAZINFORM – Ekologııa jáne tabıǵı resýrstar, Sý resýrstary jáne ırrıgatsııa, Jasandy ıntellekt jáne tsıfrlyq damý, Tótenshe jaǵdaılar, Kólik mınıstrlikteri men Aqmola, Aqtóbe, Batys Qazaqstan, Qostanaı jáne Soltústik Qazaqstan oblystarynyń ákimdikteri atqarylyp jatqan jumystar týraly esep berdi. Bul týraly Úkimettiń baspasóz qyzmeti habarlady.
El boıynsha sý basý qaýpi bar 1242 eldi meken anyqtaldy. Injenerlik jumystar jospary 800-den astam is-sharany qamtıdy, sonyń ishinde 557-si oryndaldy, qalǵany júrgizilý satysynda. Óńirlerde 666 shaqyrymǵa jýyq qorǵanys bógetteri men bilikteri salynyp, jóndelip, nyǵaıtyldy. 356 shaqyrym drenaj júıesi jóndelip, jańadan salyndy, 220 shaqyrym arna men aryq retke keltirildi. Qaýipti aımaqtarda 400 shaqyrymnan astam ózen jaǵalaýlaryn bekitý, arnalardy tereńdetý jáne túzeý jumystary atqaryldy.
Qoldanystaǵy 31 maýsymdyq gıdrobeketke qosymsha, sý tasqyny qaýpi joǵary ýchaskelerde taǵy 32 deńgeı ólsheıtin beket ornatylady. Qańtar-naýryz aılarynda qar jamylǵysyndaǵy ylǵal qoryn anyqtaý úshin qar ólsheý jumystary júrgiziledi. Ózen alaptary boıynsha, sonyń ishinde transshekaralyq ózenderde gıdrologııalyq boljamdar jasaldy. Negizgi ózenderde batımetrııalyq zertteý jáne topografııalyq túsirilimder júrgizilýde. Tasqyn aqparattyq júıesiniń ınterfeısi jańartylyp, derekqory tolyqtyrylyp jatyr.
Sý qoımalary bekitilgen jumys tártibi boıynsha paıdalanylyp jatyr. Eldi mekenderge jaqyn ornalasqan ózenderdiń 800 shaqyrymnan astam ýchaskesinde arnalardy tazartý jáne retke keltirý jumystary josparlanǵan. Respýblıkalyq mańyzy bar avtojoldarda kúrdeli jáne ortasha jóndeý aıasynda 227 sý ótkizý nysany ornatyldy, jyl basynan beri 200-den astam sý ótkizgish qubyr salyndy, taǵy 169-ynyń qurylysy jalǵasyp jatyr. Shyǵys Qazaqstan jáne Qostanaı oblystarynda 5 kópirge kúrdeli jóndeý júrgizildi.
Aldyn ala boljam boıynsha, aldaǵy qys qalypty jyly bolady dep boljanyp otyr. Jaýyn-shashyn mólsheri el aýmaǵynyń basym bóliginde klımattyq normadan aspaıdy. Alaıda «temperatýralyq aýytqýlar» nátıjesinde qar qabatynda muzdy qyrtys túzilýi múmkin, bul óz kezeginde sý tasqyny jaǵdaıyn qıyndatýy múmkin.
Qanat Bozymbaev barlyq daıyndyq jumysyn qys túskenge deıin tolyq aıaqtaýdy tapsyrdy. Ákimderge jaǵdaıdy jeke baqylaýda ustaýdy, Tótenshe jaǵdaılar mınıstrligine sý tasqyny qaýpi joǵary óńirlerge baryp, júrgizilip jatqan jumystardyń barysyn tekserýdi júktedi.
Sý resýrstary jáne ırrıgatsııa mınıstrligine sý qoımalaryn turaqty baqylaýda ustap, tasqyn sýlardy qabyldaýǵa jetkilikti bos kólemniń bolýyn qamtamasyz etý, sondaı-aq kórshiles eldermen transshekaralyq ózenderdegi sý aǵymdary boıynsha derekter almasýdy júıeli túrde júrgizýdi tapsyrdy.
Aıta keteıik, óńirlerde sý tasqynynyń aldyn alý jáne halyqty qorǵaý jumystary kúsheıtildi.