Qysqy Azııa oıyndarynda altynnan úmit bar ma – mınıstr boljamy

ASTANA. KAZINFORM – Týrızm jáne sport mınıstri Erbol Myrzabosynov Qytaıda ótetin qysqy Azııa oıyndarynan el qorjynyna túsetin medaldarǵa boljam jasady.

- Aldyńǵy Azııa oıyndarynda jalpy komandalyq esepte tórtinshi orynǵa turaqtady. Bul joly Azııa oıyndarynda konkımen júgirý, short-trek, shańǵy sporty jáne bıatlon sekildi sport túrlerinen altyn medalǵa úmit artyp otyrmyz, - dedi Erbol Myrzabosynov Úkimet otyrysynan keıin ótken baspasóz máslıhatynda. 

Osylaısha mınıstr otandyq sportshylardyń júıeli daıyndalǵanyn aıtyp, oń nátıje kútip otyr. 

- Joǵaryda atalǵan tórt sport túrinen bizdiń komanda kýbok kezeńinde joǵary nátıje kórsetti, qysqy oıyndarda da sol nátıjeni josparlap otyr. Bul jaı ǵana boljam emes — Azııa elderi arasyndaǵy aǵymdyq nátıjeler boıynsha bizdiń sportshylar kóshbasshy, - dep tolyqtyrdy vedomstvo basshysy. 

Aıta keteıik, qysqy Azııa oıyndarynda Qazaqstan sportshylary 51 medal jıyntyǵy úshin kúresedi. Aıtýly sport básekesinde elimizdiń namysyn 138 sportshy qorǵaıdy.