Qysqa arnalǵan aıaq kıim baǵasy óńirlerde qanshadan bastalady
Qazaqstannyń 16 iri qalasyndaǵy qysqa arnalǵan jyly aıaq kıim baǵasy 12 myń teńgeden bastalyp, 230 myń teńgege deıin jetedi. Kazinform agenttiginiń tilshisi óńirlerdegi etiktiń eń arzan men eń qymbaty qaıda satylatynyn bildi.
Shymkent qalasynda baǵa alshaq. Áıelderge arnalǵan etik baǵasy 36 000 - 220 000 teńge aralyǵynda. Al er adamdarǵa arnalǵan aıaq kıim baǵasy 20 myń teńgeden bastalyp, 230 myń teńgege deıin jetedi.
Almaty qalasynda da baǵa joǵary. Munda taza bylǵarydan tikken etikterdi 35 000 - 120 000 teńgege satyp alýǵa bolady. Erlerge arnalǵany - 16 000 - 100 000 teńge.
Astana qalasynda áıelderge arnalǵan etik quny 25 myń teńgeden bastalyp, 100 myń teńgege deıin jetti. Al erlerge arnalǵany 19 400 teńgeden bastalady.
Qaraǵandyda da (áıelderge arnalǵany 25 000 - 150 000 teńge, erlerdiń aıaq kıimi 30 000 - 120 teńge) baǵa osy shamalas.
Elimizdiń batysy men soltústigindegi Aqtóbe, Oral, Qostanaı qalalarynda da baǵa joǵary. Aqtóbe qalasynda etik baǵasy 33 500 - 160 000 teńge, al erler aıaq kıimi 40 000 - 120 000 teńge aralyǵynda. Qostanaıda 25 000 - 100 000 jáne 21 000 - 130 000 teńge aralyǵynda.
Qyzylorda men Pavlodarda baǵa qoljetimdi. Qyzylordada áıelderge arnalǵan aıaq kıim 15 - 20 myń teńge aralyǵynda. Al erler aıaq kıimi - 20 myń teńge. Pavlodarda baǵa - 12 000 - 24 000 teńge aralyǵynda. Bul áıelderge arnalǵan bylǵary aıaq kıim baǵasy. Al erlerge arnalǵany - 14 000 - 39 000 teńge.
Taldyqorǵanda áıelderge arnalǵan etik baǵasy 25 000 - 90 000 teńge aralyǵynda. Erlerge arnalǵan aıaq kıim baǵasy - 20 000 - 55 000 teńge. Qonaev qalasynda etikti 20 000 - 75 000 teńgege (áıelderge) jáne 22 000 teńgege (erler) satyp alýǵa bolady.
Qazir Almaty men Shymkentte aıaq kıim baǵasy joǵary. Munda túrli brend aıaq kıimderin satyp alýǵa bolady. Taza bylǵarydan tikkeni sapasyna qaraı baǵasyn qoıady.
Al Qyzylorda, Pavlodar men Tarazda baǵa ózge óńirlerge qaraǵanda tómen.
Aıta keteıik, qysqa arnalǵan jyly aıaq kıim baǵasyna birneshe faktor áser etedi. Olar: materıaly, brend, valıýta baǵamy men lıgostıka.
Jalpy alǵanda baǵa ótken jylmen salystyrǵanda turaqty, kúrt ósim baıqalmaıdy.
Buǵan deıin Qazaqstandaǵy qoǵamdyq kólikterdiń jolaqysy týraly jazyldy. Sonymen birge TQS pen UBT kýrstary qyzmeti týraly bildik.