Qysqa ári qaýipsiz: ShQO-da Osınov asýyn aınalyp ótetin jańa joldyń paıdasy qandaı
ÓSKEMEN. KAZINFORM – Óskemennen Altaı men Katonqaraǵaıǵa bet alǵan júrgizýshiler endi kúrdeli de qaýipti Osınov asýyn aınalyp ótetin bolady. Sebebi birneshe jylǵa sozylǵan jańa jol qurylysy aıaqtalýǵa taıaý. Uzyndyǵy 12 shaqyrymǵa jýyq bul baǵyt jol uzaqtyǵyn qysqartyp qana qoımaı, qaharly qystyń qatal kúnderinde qaýipsizdikti arttyryp, óńirdiń týrıstik baǵyttaryna jetýdi jeńildetpek.
Bıyl 30 maýsymda Parlament palatalarynyń birlesken otyrysynda Memleket basshysy Qasym-Jomart Toqaev Qazaqstandy úlken qurylys alańyna aınaldyrýymyz kerektigin málim etken bolatyn.
- Bizdiń aldymyzda asa mańyzdy, óte jaýapty jáne shuǵyl mindet bar. Bul - keń aýqymdy qurylys júrgizý. Elimizde neǵurlym qurylys kóp bolsa, Qazaqstan da soǵurlym órkendeı beredi. Eń aldymen, bul - negizgi ınfraqurylymǵa qatysty maqsat. Biz temirjoldardy, avtojoldardy, áýejaılardy, vokzaldardy, sýmen qamtamasyz etetin iri qurylǵylardy, óndiris jáne ónim kásiporyndaryn, qala ǵımarattaryn jáne taǵy basqa nysandardy joǵary qarqynmen salýymyz kerek, - degen edi Prezıdent.
Osy rette, Shyǵys Qazaqstan oblysynda jol jaǵdaıyn jaqsartý maqsatynda qolǵa alynǵan jobalardyń biri - Osınov asýyn aınalyp ótetin jańa jol qurylysy. Bul maqalada sol joldyń halyqqa qandaı paıdasy baryn tarqatpaqpyz.
Sozbalańǵa salynýyna ne sebep?
Áýeli sheginis jasap, jobanyń qalaı «saqaldy qurylysqa» aınalǵanyn aıta keteıik. Jol qurylysy 2017 jyly bastalyp, 3 jylda aıaqtalady dep josparlanǵan-tuǵyn. Alaıda orman qoryna tıesili jer telimderin rásimdeýdegi qıyndyqtarǵa baılanysty merdiger kompanııa jobany iske asyrýdan bas tartty.
Keıin ınflıatsııa, jobadaǵy ózgerister men uzaqqa sozylǵan kelisimder joldy óńirdegi eń uzaqqa sozylǵan qurylysqa aınaldyrdy. Turalap qalǵan qurylys jumystary tek 2023 jyldyń qarashasynda qaıta jandandy.
Alaıda sol kezde de qurylys jumystaryn jyldam aıaqtaý múmkin bolmady. Buǵan merdigerlerdiń aýysýy, qarjylandyrýdyń jetkiliksizdigi jáne jobalaý kezinde jiberilgen qatelikter sebep boldy. Atap aıtqanda, bıik taýly aımaqtaǵy kópirdi salý kezinde topyraqtyń erekshelikteri tolyq eskerilmegendikten, tirek konstrýktsııalaryn ornatýda qıyndyqtar týyndaǵan. Keıinnen jobalyq sheshimder qaıta qaralyp, jumys ilgerileı bastady.
Jol uzaqtyǵy qysqarady
Bıyl jazda oblys ákimdigi Osınov asýyndaǵy jol kúzde paıdalanýǵa beriledi dep habar taratty. Jobanyń jalpy quny - 19,9 mlrd teńge. Rasymende qurylys jumystary aıaqtalýǵa taıaý qalyp otyr.
- Shyǵys Qazaqstan oblysynda Memleket basshysy Qasym-Jomart Toqaevtyń tapsyrmasyna sáıkes, týrıstik baǵyttarǵa aparatyn joldardyń sapasy men qozǵalys qaýipsizdigin arttyrýǵa erekshe kóńil bólinip jatyr. Osy maqsatta qolǵa alynǵan jobalardyń biri - Osınov asýyn aınalyp ótetin jańa jol qurylysy. Búginde uzyndyǵy 12 shaqyrymǵa jýyqtaıtyn joldyń negizgi bóligi daıyn. Joldy qarasha aıynyń birinshi onkúndiginde paıdalanýǵa berý josparlanyp otyr, - dep habarlady ShQO ákiminiń baspasóz qyzmetinen.
Jańa joldyń iske qosylýy jol qozǵalysynyń qaýipsizdigin aıtarlyqtaı arttyrady. Jaz mezgilinde demalys kúnderi ǵana Óskemennen Buqtyrma sý qoımasyna qaraı 20 myńnan astam avtokólik qatynaıdy. Jol paıdalanýǵa berilgennen keıin júrgizýshiler qaýipti Osınov asýyn aınalyp ótip, Altaı, Úlken Naryn jáne Katonqaraǵaı aýdandaryndaǵy týrıstik baǵyttarǵa áldeqaıda jyldam jete alady.
- Jyl saıyn jazda bala-shaǵammen Buqtyrma jaǵalaýyna baryp demalamyz. Sol kezde osy Osınov asýymen júrgende janymyzdy shúberekke túıip ótemiz desem artyq aıtqandyq emes. Sebebi bir teris qımyl jasasań jyraǵa qulaısyń. Al qysta bul jolmen múlde júrmeýge tyrysamyn. Sondyqtan jańa joldyń ashylýyn taǵatsyzdana kútip júrmin, - deıdi óskemendik Nurbolat Qadyrbaev.
Jańa joldaǵy kópirdiń uzyndyǵy 176 metr, al bıiktigi 45 metr. Joldyń taǵy bir mańyzdy ereksheligi - onyń burynǵy aınalma baǵytpen salystyrǵanda shamamen 6 shaqyrymǵa qysqa bolýy. Bul júrgizýshilerdiń ýaqytyn únemdeýge múmkindik beredi.
Sońǵy arqalyq ornatyldy
Osınov asýy - qysta aýa raıynyń qolaısyzdyǵyna baılanysty kólik qozǵalysy kúrdelenetin ýchaskelerdiń biri. Jańa joldyń iske qosylýy osy aýmaqtaǵy qozǵalys qaýipsizdigin arttyryp, kólik qatynasyn jeńildetýge múmkindik beredi.
Sonymen qatar jańa baǵyt Shyǵys Qazaqstannyń týrıstik áleýetin damytý úshin mańyzdy. Jol paıdalanýǵa berilgennen keıin demalýshylar Altaı, Úlken Naryn jáne Katonqaraǵaı aýdandaryndaǵy týrıstik nysandarǵa qaýipsiz ári qysqa baǵytpen jete alady.
Al 20 qyrkúıekte qurylysshylar Pıhtovka ózeni arqyly ótetin kópirge sońǵy arqalyqty ornatty.
- Biz Qazaqstandaǵy eń bıik kópirdi salyp jatyrmyz. Bıiktigi 45 metr bolatyn kópir endi eki taý jotasyn jalǵap tur. Alda qurylys-montajdaý jumystarynyń sońǵy kezeńi qaldy. Bul jol paıdalanýǵa berilgende júrgizýshiler qaýipti taý serpantınin aınalyp ótip, dittegen jerine áldeqaıda qaýipsiz ári qolaıly jaǵdaıda jetetin bolady, - dedi oblys ákimi Nurymbet Saqtaǵanov.
P/s: Osınov asýyn aınalyp ótetin jańa jol - jolǵa qatysty kezekti bir joba ǵana emes. Bul - jyldar boıy halyqty tolǵandyrǵan máseleniń sheshýi, jol qaýipsizdigin kúsheıtip, ýaqytty únemdeýge jáne Shyǵys Qazaqstannyń týrıstik áleýetin arttyrýǵa baǵyttalǵan mańyzdy qadam. Jańa joldyń paıdasyn kún saıyn osy baǵytpen júretin júrgizýshiler men jolaýshylar kórmek.
Eske salsaq, buǵan deıin Túrkistanda jol qurylysy materıaldarynyń 50-den astam synamasy talapqa saı bolmaǵany habarlanǵan.
